Euro prek nivelin më të lartë që nga 1 korriku – Monedha e përbashkët fiton terren këtë javë. Rritet edhe dollari e veçanërisht paundi

Euro ka fituar këtë fundjavë terren ndaj lekut duke u rritur në kuotat më të larta të shënuara që prej korrikut. Por shumë e lartë është edhe vlera që monedha e përbashkët evropiane ka rikuperuar në raport me lekun, duke u rritur me 0.98 lekë brenda 24 orësh. Sipas Bankës së Shqipërisë, një euro sot është këmbyer në tregun tonë valutor me 106.01 lekë, nga 105.03 të enjten.

Ajo është blerë nga agjentët e kembimit valutor me 105.49 lekë dhe është shitur me 106.52 lekë. Rritja e fundit e ndjeshme e monedhës së përbashkët evropiane ishte shënuar më 28 korrik, kur ajo shënoi kursin mesatar të këmbimit prej 105.85 lekësh në raport me lekun. Korriku gjithashtu ishte muaji në të cilin euro preku edhe vlerën më të ulët historike, duke u këmbyer me 100.49 lekë.

Rritje të ngjashme, madje në disa raste edhe më të fortë kanë shënuar edhe valutat e tjera. Dollari amerikan u rrit me 0.86 lekë në 24 orët e fundit, ndërkohë që edhe më e fortë ishte paundit britanik, vlera e të cilit u shtua me 1.13 lekë brenda 24 orëve.

Agjencitë e këmbimit valutor nuk e lidhin rritjen e euros këtë javë me rritjen e blerjeve në treg nga ana e Bankës së Shqipërisë, në një kohë që nuk shohin rënie domethënëse të flukseve të monedhës së përbashkët evropiane që ushtrojnë presione nënçmuese ndaj saj.

Në fillim të gushtit Banka e Shqipërisë bëri publik vendimin për të tërhequr më shumë euro duke shtuar blerjet në tregun e brendshëm. Ajo ndërhyri në kalendarin e blerjeve duke rritur nga 220 milionë euro në 300 milionë euro kufirin e blerjeve. Deri në këtë fazë të vitit ajo ka blerë në tregun e brendshëm 188 milionë euro, ndërkohë që rreth 130 milionë euro të tjera parashikohet të blihen nga gushti deri në fund të vitit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.