Evazioni fiskal në Greqi, në shifra rekord – Dëmi në buxhet llogaritet 60 miliardë euro në vit
Evazioni fiskal në Greqi tejkalon 60 miliardë euro në vit. Deklarata u bë nga guvernatori i Bankës së Greqisë, Yannis Stournaras. Të ardhurat e deklaruara zyrtarisht në vend arritën në 80 miliardë euro, ndërsa konsumi në 140 miliardë euro, tha ai, duke shtuar se ky konsum nuk u shoqërua me rënie të kursimeve, që në fakt vazhdoi të rritet.
Ai theksoi se vendi konsiderohet kampion europian në fushën e evazionit fiskal pavarësisht progresit të bërë në rritjen e të ardhurave nga taksat si përqindje e PBB-së.
Duke komentuar kreditë me probleme, ai tha se një nismë legjislative ishte gati për t’iu dërguar ministrit të ardhshëm të financave për të zbatuar një kod të përbashkët etike për fondet që shërbejnë kredi me probleme.
Në ankandet e aktiveve, bankieri qendror tha se huamarrësit e cenueshëm duhet të mbrohen. Ai tha gjithashtu se për të reduktuar diferencën e normave të larta të interesit midis depozitave dhe kredive, Greqia duhet të përmirësojë konkurrencën në sistemin bankar, duke ndihmuar bankat më të vogla dhe duke i kërkuar qeverisë të ofrojë kushte të barabarta konkurrence.
Sturnaras shprehu besimin e tij se vendi do të rifitojë pikë në shkallën e investimit këtë vit dhe përsëriti se Greqia ka nevojë për një qeveri me një horizont afatgjatë.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.