Të drejtat e të punësuarëve në kompanitë online – BE, rregulla në mbrojtje të tyre. “Zemërohen” punëdhënësit

Vendet e Bashkimit Europian kanë vendosur të modifikojnë rregullat që synojnë t’u japin mbrojtje dhe përfitime të puënsuarëve në kompanitë online. Vendimi u mor në prag të negociatave me ligjvënësit e BE-së që duan rregulla më gjithëpërfshirëse.

Drafti i rregullave të shpallura nga ekzekutivi i BE-së në fund të vitit 2021 do të ishte i pari global dhe është pjesë e një legjislacioni që synon të sigurojë një fushë loje të barabartë midis bizneseve online dhe atyre tradicionale.

Në draft versionin e rënë dakord, vendet e BE-së propozojnë që kompanitë të konsiderohen punëdhënëse nëse plotësojnë tre nga shtatë kriteret.

Ndër kriteret renditet dhe mbikëqyrja e performancës së punëtorëve përmes mjeteve elektronike, mundësia e tyre për të zgjedhur orarin e punës dhe kufizimi i detyrave, ndalimi për të punuar për palët e treta, vendosja e një kufiri të sipërm për pagën, vendosja e rregullave për pamjen ose sjelljen e tyre dhe kufizimi i mundësive për të përdorur nënkontraktorë ose zëvendësues.

Ekzekutivi i BE-së tha se rregullat do të mbulonin rreth 4.1 milion nga 28 milion punëtorë në kompanitë e platformave online në të gjithë Bashkimin Europian 27-anëtarësh.

Parlamenti Europian, i cili propozoi ndryshimet e veta në shkurt, dëshiron që rregullat të përfshijnë një listë treguese të kritereve për të përcaktuar nëse një punëtor gëzon të drejtat që i takojnë. Si për shembull nëse punëtori i nënshtrohet një page fikse, orareve të përcaktuara të punës, kohës së punës dhe mbikëqyrjes nga punëdhënësi.

Vendet e BE-së këmbëngulin se punëtorët duhet të informohen për përdorimin e algoritmeve të përdorura në proceset e vendimmarrjes në punë, kur këto vendime kanë të bëjnë me ta, ndërsa ligjvënësit thonë se vendimet e rëndësishme nuk duhet të merren nga sisteme të automatizuara. Vendet e BE-së, ligjvënësit e BE-së dhe Komisioni tani do të përpunojnë detajet përpara se drafti të bëhet legjislacion.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.