Fatalitetet në punë: Ku ndodhin më së shumti në Europë?

Rreth 3,347 vdekje në vendin e punës u regjistruan në të gjithë BE-në në vitin 2021, sipas të dhënave nga Eurostat, me Letoninë dhe Lituaninë që regjistrojnë normat më të larta të aksidenteve fatale. Ndërkohë, sipas të dhënave më të fundit të zyrës së statistikave të BE-së, ka pasur 2.88 milionë aksidente jo-fatale në vendin e punës në të gjithë BE-në në vitin 2021. Edhe pse jo vdekjeprurëse, këto aksidente ishin aq të rënda sa të çonin në të paktën katër ditë pushim nga puna.

BE-ja i përkufizon aksidentet në vendin e punës si “një dukuri diskrete gjatë rrjedhës së punës që çon në dëmtim fizik ose mendor”. Këtu përfshihen aksidentet e trafikut rrugor gjatë turnit të një punonjësi, por jo gjatë rrugës për në ose nga puna – megjithëse disa vende, si Franca, e konsiderojnë një aksident automobilistik gjatë rrugës për në punë si një aksident në vendin e punës. Një aksident fatal në vendin e punës konsiderohet i tillë kur vdekja ndodh më pak se një vit pas aksidentit të viktimës në vendin e punës.

Aksidentet jo fatale në vendin e punës për 100.000 punëtorë

“Fatkeqësisht, mund të thuhet me të vërtetë se aksidentet në vendin e punës janë relativisht të zakonshme në Europë,” tha këshilltari i lartë i Konfederatës së Sindikatave Europiane (ETUC), Ignacio Doreste. Ndërkohë, të dhënat treguan se meshkujt janë më të rrezikuar, ku 68.3% e tyre përbëjnë viktima të aksidenteve jo fatale në vendin e punës. Një shpjegim është se burrat zënë pozicione me kohë të plotë më shpesh se gratë, duke i bërë ata të kalojnë më shumë kohë në punë dhe në mënyrë proporcionale duke rritur gjasat për të ndodhur aksidente.

Fushat e dominuara nga meshkujt janë gjithashtu faza e një pjese të madhe të aksidenteve në vendin e punës, ku ndërtimi është sektori ku ndodhin më shumë aksidentet me fatalitet. Ndërtimi, së bashku me transportin dhe magazinimin, prodhimin dhe sektorët e bujqësisë, pylltarisë dhe peshkimit përbëjnë gjithashtu dy të tretat e aksidenteve jo fatale në vendin e punës.

Aksidentet fatale për 100.00 punëtorë

Të dhënat e BE-së tregojnë se të gjitha aksidentet janë kryesisht rezultat i humbjes së kontrollit të pajisjeve të punës (transportit, veglave ose makinerive). Rënia, pengimi ose rrëshqitja janë në vend të dytë. “Gabimet njerëzore shpesh perceptohen si faktorë të pashmangshëm që çojnë në aksidente, pavarësisht nga fakti se shkaqet e vërteta themelore prapa veprimeve njerëzore shpesh kanë origjinë organizative,” tha Ignacio Doreste.

Sindikata mbarë europiane ETUC nënvizoi se nevojiten një përzierje e legjislacionit të mirë, zvogëlimit të rrezikut dhe hapave parandalues për të shmangur aksidentet në vendin e punës. Ata thonë se është roli i punëdhënësit të sigurojë një mjedis të sigurt pune – duke përfshirë shëndetin mendor të punonjësve të tyre. Aksidentet fatale në vendin e punës parashikohen të vazhdojnë deri në vitin 2062 bazuar në normën aktuale, e cila është shtatë vjet më e gjatë se sa pritej më parë.

“Ne u bëjmë thirrje organeve qeverisëse europiane të miratojnë legjislacionin që mbron punëtorët nga rreziqet që lidhen me ndryshimet klimatike,” shtuan ata, duke kujtuar rreziqet që lidhen me motin ekstrem të fundit. Të paktën gjashtë punëtorë vdiqën në Francë në shtator ndërsa korrnin rrush në rajonet Rhône dhe Champagne. Të gjithë ata pësuan arrest kardiak pas orësh të punës në fusha nën nxehtësinë 35 gradë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.