Fenomeni i spekulimeve në Britaninë e Madhe – 3/4 e prodhuesve shtuan fitimet e tyre duke rritur çmimet e ushqimeve

Rregullatori i konkurrencës në Britani po akuzon kompanitë ushqimore për rritjen e çmimeve më shumë se kostot, duke rritur inflacionin e ushqimeve. Autoriteti i Konkurrencës dhe Tregjeve – CMA, njoftoi se hetimi i nisur në korrik në sektorin e ushqimeve dhe supermarketeve zbuloi se inflacioni rekord i ushqimeve u nxit kryesisht nga rritja e kostove të importit.

Megjithatë, sipas raportit, rreth 3/4 e prodhuesve të markave, veçanërisht prodhuesit e qumështit për foshnjat, kishin rritur përfitimin e tyre duke rritur çmimet e ushqimeve.

Çmimet e ushqimeve dhe pijeve joalkoolike u rritën në 19.2%, niveli më i lartë në 45 vjet, në mars 2023, sipas Zyrës për Statistikat Kombëtare, ndërsa çmimet e ushqimeve me shumicë u rritën në verën e vitit 2022 pas pushtimit të Rusisë në Ukrainë, duke goditur familjet më të varfra. Të dhënat tregojnë se inflacioni i ushqimeve është ngadalësuar që atëherë, me firmën kërkimore Kantar që regjistroi një rritje prej 9.7% në katër javët deri në 29 tetor.

Aktualisht inflacioni i ushqimeve po ushtron presion të madh mbi buxhetet e familjeve, kështu që është jetike që çështjet e konkurrencës të mos shtojnë problemin, shprehen ekspertët. Hetimi vjen pasi Ministri i Financave Jeremy Hunt tha se do të shqyrtojë rastet e përfitimit në zinxhirin e furnizimit të industrisë ushqimore në një përpjekje për të ndihmuar familjet.

Nga ana pozitive e hulumtimit, konsumatorët mundën të gjenin më së shumti alternativa më të lira, duke ulur ndikimin në inflacionin e ushqimeve. Përveç rastit të qumështit të foshnjave, CMA zbuloi se konsumatorët shpesh kalojnë nga produktet e markës në produktet e etiketës private ose ulin në mënyrë drastike konsumin, gjë që redukton pjesën e tregut të prodhuesve të mëdhenj të ushqimit.

Familjet në Mbretërinë e Bashkuar janë ende nën presion pavarësisht inflacionit më të ulët në dy vjet. Çmimet e formulës së bebeve janë rritur me 25% në dy vitet e fundit, periudhë në të cilën ata kanë ruajtur marzhe të larta fitimi sepse prindërit kanë pak zgjedhje. Rregullatori është i shqetësuar se prindërit mund të mos kenë gjithmonë informacionin e duhur për të bërë zgjedhje të informuara dhe se furnizuesit mund të mos kenë stimuj të fortë për të ofruar qumësht për foshnjat me çmime konkurruese.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.