Firence u shpall luftë qirave të stilit Airbnb – Zgjerimi i tyre në qendër të qytetit ka sjellë qira rekord

Firence, një pikë referimi botërore për artet, kulturën dhe historinë e njerëzimit, po kthehet në një “qytet Airbnb”, por edhe një simbol i rezistencës kundër hiperturizmit në Itali. Përhapja e qirave afatshkurtra ka bërë që qiratë të rriten në nivele rekord, duke bërë që banorët e përhershëm të largohen. Dyqanet për vendasit tani janë të pakët në numër, ndërsa në qendër të qytetit, shumica e ndërtesave kanë bravë elektronike që u lejojnë qiramarrësve të hyjnë në banesën e tyre për një kohë të shkurtër pa pasur nevojë të takojnë pronarin.

Në qendrën historike të Firences – një vend i Trashëgimisë Botërore të UNESCO-s – 30% e shtëpive janë të listuara në Airbnb, sipas një studimi nga Universiteti La Sapienza i Romës. Italia ka lejuar që platformat e qirave afatshkurtra të funksionojnë kryesisht të parregulluara, me listimet e Airbnb vetëm në Firence më shumë se dyfishuar që nga viti 2016. Qiratë afatgjata janë rritur 42% gjatë së njëjtës periudhë, sipas kryetarit të bashkisë së qytetit, Dario Nardella. 40.000 banorët që mbeten në Firencen qendrore papritmas e gjetën veten duke jetuar në komplekse hotelesh me kosto të mëdha, çarçafë të pista dhe zhurmë, theksoi Nardella.

Çështja e banesave të përballueshme doli në qendër të vëmendjes në Itali këtë vit pasi studentët filluan të ngrejnë kampe para universiteteve në Milano, Romë dhe qytete të tjera për të protestuar ndaj qirave të larta. Pronarët e banesave në vend shpesh preferojnë t’i ofrojnë apartamentet e tyre përmes Airbnb në vend që të kenë një qiramarrës afatgjatë, jo vetëm sepse është më fitimprurës, por edhe më pak i rrezikshëm. Ligji italian e bën të vështirë dëbimin e qiramarrësve afatgjatë që nuk paguajnë qiranë dhe nëse kanë fëmijë që jetojnë me ta, është pothuajse e pamundur.

Në tetor, qyteti miratoi një ligj që ndalon listimet e reja në platformë. Qyteti shpreson të jetë një pionier në Itali, duke treguar se përhapja e Airbnb mund dhe duhet të ndalet. Pronarët dhe menaxherët profesionistë të qirasë afatshkurtër po zotohen të luftojnë ligjërisht kufizimet. Qeveria, sërish e ka diskutuar këtë çështje, por deri më tani nuk ka bërë ndonjë ndërhyrje serioze. Projektbuxheti i vitit 2024 do të rriste normën e taksës mbi të ardhurat nga qiratë në 26% nga 21%, duke filluar me apartamentin e dytë që qiradhënësi jep me qira. E para do të taksohet ende me 21%, në një ndryshim që kritikët thonë se do të bëjë pak ndryshim.

Destinacione të tjera turistike europiane kanë kufizuar gjithashtu qiratë afatshkurtra. Amsterdami prezantoi rregulloret e para në 2014, sipas të cilave apartamentet nuk mund të jepen me qira në platforma të tilla si Airbnb për më shumë se 30 ditë në vit. Barcelona, Parisi dhe Berlini gjithashtu kanë kufizuar në mënyrë agresive qiratë afatshkurtra. Qyteti i Nju Jorkut filloi zbatimin e rregullave të reja në shtator, me Airbnb duke kritikuar ndalimin de facto të qirave afatshkurtra.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.