Franca këmbëngul në uljen e shpenzimeve publike – Ministri i financave premton vazhdimin e projektit

Ministri francez i Financave, Bruno Le Maire, do të ketë një qasje më të rreptë ndaj financave publike, sipas deklaratës së bërë para gazetarëve, duke paralajmëruar shkurtime të mëdha në shpenzimet publike.

Në një intervistë për mediat vendase, Le Maire premtoi uljen e mëtejshme të shpenzimeve publike, duke thënë se Franca duhej t’i përmbahej programit të saj të reduktimit të borxhit pasi shmangi një ulje nga agjencia e vlerësimit S&P këtë muaj.

Megjithëse S&P ruajti vlerësimin e saj AA për borxhin sovran të Francës, qëndroi i kujdesshëm në lidhje me perspektivën për shkak të financave të tendosura publike.

Sipas Le Maire vendimi i S&P është një nxitje për të bërë më shumë dhe për të bërë më mirë. Ai shtoi se qeveria duhet t’i përmbahet programit të reduktimit të borxhit dhe të shkurtojë shpenzimet publike.

Franca, që regjistron një nga borxhet më të larta në Europë, me gati 110% të Prodhimit të Brendshëm Bruto, tha muajin e kaluar se planifikonte të ngrinte 1% të buxhetit të secilës ministri, pas një vendimi të mëparshëm për të ulur 5%, në një përpjekje për të përmirësuar uljen e deficitit.

Gjithashtu këtë verë do të përfundojë subvencionimi për gazin natyror. Le Maire u shpreh se ndërsa vendi i afrohet punësimit të plotë, ai gjithashtu mund të zvogëlojë nivelin e mbështetjes për tregun e punës. Megjithatë, qeveria nuk do të shkurtojë shpenzimet publike në mënyrë të ashpër, tha ai, dhe në vend të kësaj do të mbështesë reformat miqësore për biznesin. Por ministri i Financave bëri të qartë se pavarësisht vendimeve të marra kursimi nuk është një opsion. Sipas tij ky do të ishte një gabim ekonomik dhe politik.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.