Greqia në luftë me evazionin fiskal – Aplikacioni i ri dixhital ka si objektiv zonat turistike

Autoriteti i Pavarur i të Ardhurave Publike i Greqisë, i njohur si AADE, po përgatitet për të intensifikuar përpjekjet e tij kundër evazionit fiskal këtë verë me prezantimin e një mjeti të ri dixhital të quajtur “ELEGXOSLive”. Qëllimi është të përmirësohet barazimi mes taksave në ishujt grekë dhe zona të tjera turistike.

Aplikacioni dixhital do të sigurojë akses në kohë reale në profilet financiare dhe informacionin e arkivuar të bizneseve që i nënshtrohen inspektimit. Gjithashtu do të mundësojë kërkime dhe kontrolle të kombinuara të të dhënave financiare.

Ministria e financave dhe AADE besojnë se industria e turizmit ka potencialin për të rritur ndjeshëm të ardhurat nga taksat duke zbuluar të ardhurat e padeklaruara. Ata vënë në dukje se një pjesë e rritjes së të ardhurave nga TVSH-ja e vitit të kaluar, ishte rezultat i inspektimeve të gjera.

Objektivi është të sigurohet që qeveria e re, e formuar pas zgjedhjeve të 25 qershorit, të ketë të ardhura të shtuara që mund të përshpejtojnë arritjen e objektivave fiskalë dhe të ofrojnë më shumë hapësirë ​​për zbatimin e politikave sociale. Kjo vjen në një kohë kur parashikohen të ardhura rekord nga turizmi.

Gjatë verës, AADE planifikon të kryejë mbi 30 mijë inspektime duke përdorur aplikacionin e ri dixhital. Inspektorët do të kenë gjithashtu mundësinë të lëshojnë njoftime të menjëhershme në lidhje me rezultatet e inspektimit ose gjobat. Në varësi të shkeljes dhe për shkelësit e përsëritur, gjobat mund të përfshijnë dhe një mbyllje të përkohshme të biznesit deri në 10 ditë.

Ndër aftësitë e tjera, aplikacioni do të mundësojë inspektimet për të verifikuar vërtetësinë e faturave të lëshuara, të sigurojë që kompanitë të kenë transmetuar të dhënat e faturave në platformën ‘myDATA’, të kombinojnë deklaratat e taksave të paraqitura si dhe të shikojnë historinë tatimore, duke përfshirë shkeljet e kaluara të bizneseve që po inspektohen.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.