Gruri ukrainas, BE kërkon fuqizimin e eksportit nga toka – Rusia nuk lejon largimin e drithërave ukrainase nga portet e vendit
Bashkimi Europian po përpiqet të transportojë më shumë drithëra ukrainase përmes rrugëve dhe hekurudhave për të ndihmuar në kompensimin e tërheqjes së Rusisë nga një marrëveshje e eksporteve të Detit të Zi të mbështetur nga OKB-ja.
Rusia goditi portet ukrainase të grurit, një ditë pasi Moska u tërhoq nga një marrëveshje që lejonte drithërat ukrainase të bllokuara nga konflikti Rusi-Ukrainë të eksportoheshin në mënyrë të sigurtë.
Një zyrtar i lartë i BE-së tha se blloku i 27 vendve anëtare po mbështet Turqinë dhe Kombet e Bashkuara në përpjekjet për të rikthyer Rusinë në marrëveshje.
Kryeministri irlandez Leo Varadkar tha se blloku do të përgjigjet gjithashtu duke zgjeruar rrugët e eksportit tokësor për drithërat ukrainas nëpërmjet korsive të solidaritetit, ose lidhjeve rrugore dhe hekurudhore përmes fqinjëve të BE-së të Ukrainës, si dhe Moldavisë.
Sipas tij ka mënyra të tjera për të nxjerrë drithin nga Ukraina, për shembull përmes Rumanisë dhe Polonisë. Ai theksoi se nëse rusët vazhdojnë m këtë politikë të parandalimit të Ukrainës nga eksportimi i grurit dhe plehrave, BE do t’i duhet të gjejë mënyra të tjera për të nxjerrë drithin nga vendi.
Përpara se Rusia të sulmonte në shkurt 2022, rreth tre të katërtat e prodhimit të grurit të Ukrainës eksportoheshin në Europë, Kinë dhe Afrikë, me shumicën dërrmuese të drithërave dhe farave vajore që kalonin nëpër portet e Detit të Zi.
Komisioni Europian me qendër në Bruksel tha se kjo ka ndryshuar që kur Rusia filloi luftën dhe rreth 60% e eksporteve të grurit të Ukrainës tani kalojnë nëpër korsitë e solidaritetit të BE-së.
Zgjerimi i tranzitit të drithërave përmes BE-së ka pasoja për Poloninë dhe disa vende të tjera të BE-së në kufi me Ukrainën, ku fermerët vendas janë nën presion nga rritja e importeve ukrainase.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.