Holanda barazon pensionet me pagat – Mekanizma solidariteti për të zbutur ndikimin e viteve të vështirë

Punonjësit holandezë dhe punëdhënësit e tyre paguajnë një kontribut në fondet private të pensioneve që u garantojnë atyre një shumë të saktë pensioni.

Një sistem i tillë, së bashku me fondin shtetëror të pensioneve, u garantonte punonjësve një pension që ishte vetëm pak më pak se paga e tyre, por vitet e fundit ky sistem u përball me vështirësi, sepse normat e interesit dhe kontributet ishin shumë të ulëta për të mbajtur pensionet në përputhje me inflacionin.

Situata u ndërlikua më tej nga përkeqësimi i raportit aktive-detyrime të fondit, duke nxitur një debat midis pensionistëve dhe punonjësve për të drejtat e pagesës. Pensionistët kërkojnë që pensionet të përshtaten me inflacionin dhe punëtorët paralajmërojnë se kjo do të dëmtonte përfitimet e tyre në të ardhmen.

Në këtë situatë parlamenti i Holandës miratoi kalimin në sistemin e “kontributeve të përcaktuara”.

Sipas rregulloreve të reja, rreth 180 fonde holandeze të pensioneve do t’u tregojnë saktësisht punonjësve dhe pensionistëve se sa është pjesa e tyre në fondin e përbashkët dhe çfarë përfitimesh mund të presin realisht.

Sistemi i ri gjithashtu do ta bëjë më të lehtë për fondet që të paguajnë shuma më të mëdha pensionesh dhe përfitimesh në rast të rezultateve më të mira të investimeve, ose shuma më të vogla në rast të kthimeve më të dobëta.

Megjithatë, plani përfshin edhe mekanizma solidariteti për të zbutur ndikimin e viteve të këqija dhe për të siguruar pagesën e pensioneve deri në fund të jetës. Rregulloret e reja do të hyjnë në fuqi në vitin 2028.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.