Holanda po kompenson pasagjerët për fluturimet e humbura ndërsa në aeroporte vijon kaosi!

Aeroporti Schiphol i Amsterdamit po kompenson pasagjerët që humbën fluturimet e tyre për shkak të radhëve të gjata të sigurisë. Aeroporti holandez është një nga disa në të gjithë Europën, duke përfshirë Heathrow të Londrës, që është zhytur në kaos nga mungesa e stafit dhe kërkesa në rritje.

Aeroporti Schiphol është i dyti më i madh në Bashkimin Europian dhe ka pasur vonesa të rënda gjatë muajve të fundit.

Mungesa e stafit në pikat e kontrollit të sigurisë çoi në radhë të gjata që bënë që mijëra udhëtarë të humbnin fluturimet e tyre. Në maj, situata bëri që kompania kryesore holandeze KLM të pezullonte shitjet e biletave nga Amsterdami.

Njoftimi, i bërë të enjten në mbrëmje (11 gusht) kundërshton një kërkesë të mundshme masive për kompensim nga pasagjerët.

Personat që kanë humbur fluturimet nga Schiphol midis 23 prillit dhe 11 gushtit mund të kenë të drejtë për kompensim. Pasagjerët duhet të kenë mbërritur në aeroport në kohë, por kanë humbur fluturimin sepse kanë mbetur në radhë.

Kompensimi mbulon kostot për fluturimet zëvendësuese, udhëtimin dhe akomodimin shtesë, transportin dhe aktivitetet e rezervuara në destinacionin e udhëtarëve. Schiphol nuk tha se sa do t’i kushtonte aeroportit skema e kompensimit.

Linjat ajrore dhe aeroportet në Europë shkurtuan vendet e punës gjatë pandemisë COVID-19, duke e bërë të vështirë rikthimin e shpejtë për t’i shërbyer shpërthimit të ri të udhëtarëve. Në të njëjtën kohë, stafi i aeroportit dhe i linjave ajrore janë në grevë për pagat dhe kushtet e punës.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.