Inspektorët shtetërorë të pakualifikuar, ndryshon Ligji: Kontrollet jo më nga 1 person, por trupa me 3-5 specialistë. Jo më 100 mijë inspektime në vit

Qeveria po planifikon ndryshime rrënjësore në ligjin për Inspektimin Publik, me argumentin se aktualisht ky funksion shumë i rëndësishëm kryhet nga trupa të pa kualifikuara, pa arsimin përkatës, të cilat sjellin  mungesë të monitorimit të zbatueshmërisë së kuadrit rregullator nga bizneset dhe jo vetëm.

Më tej Këshilli i Ministrave argumenton se struktura vuan nga mungesa e paisjeve, materialeve laboratorike si dhe mjeteve të tjera logjistike, ndërkohë që një nga problemet më të mprehtë lidhet me faktin se një pjesë e mirë e inspektimeve kryhen nga një inspector i vetëm, në një kohë që haset shpesh edhe fenomeni i inspektimeve të dubluara me kërkesa ligjore të njëjta nga inspektoratet shtetërore të ndryshme.

Të gjitha këto përkthehen në mungesë performance të sistemit të inspektimit public, ose më keq akoma, në korrupsion, apo ndikim politik. Këshilli i Ministrave i referohet një një studimi të vitit 202, i cili ka rezultuar me mbi 50% të Vendimeve Administrative, të shfuqizuara nga trupat kolegjiale pranë Inspektorateve Shtetërore dhe 75% e Vendimeve Administrative të lëna në fuqi, janë shfuqizuar në gjykatë.

Shkak për të cilin Këshilli i Ministrave ka studiuar dy opsione: i pari që parashikon implementimin e një ligji të ri, dhe i dyti që parashikon ndryshime në ligjin actual dhe vendosjen e sistemit me grada për inspektorët.

Opsioni i parë, i cili është edhe projektligji i hedhur për konsultim public, parashikon se trupat inspektuese nuk do të organizohen me 1 – 2 inspektorë, por në trupa inspektuese me 3 – 5 inspektorë; do të ulet numri i inspektimeve në Operatorët e Biznesit, nga 107082 inspektime/vit, në 44724 inspektime/vit, pra parashikohen të realizohen ~ 1/2 e inspektimeve; do të garantohet, ulje e barrës administrative ndaj subjektit si dhe kostos në kohë/orë inspektimi në subjekt; ndërokohë që parashikohet të ulet numri i inspektimeve të paprogramuara nga 40% në 20% duke marrë parasysh edhe drejtoritë/agjencitë e evidentuara që nuk zbatojnë ligjin për inspektimin.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.