Investime në eficiencë energjie – Masë prioritare nga qeveria. Sfidë, ulja e konsumit final në ndërtesa, industri, transport

Investimet në eficiencën e energjisë janë një nga masat prioritare për periudhën 2024 -2026, sipas programit të reformave ekonomike, të miratuar nga qeveria. Sipas dokumentit, edhe pse buxheti i shtetit ka rritur kontributin në këtë fushë, mungesa e instrumenteve financuese për zbatimin e masave në eficiencën e energjisë është për t’u trajtuar, duke sugjeruar rritje të financimit në këtë drejtim. Po ashtu, teksa sektori rregullohet nga 2 ligje kryesore, aktet e mëtejshme nënligjore që trajtojnë fushat kyçe sikurse janë detyrimet e eficiencës së energjisë dhe kriteret për prokurimin publik janë në vazhdim dhe mbeten prioritet.

Ndërkaq, sfida kryesore do të jetë zbatimi i tyre për përmirësimin e efikasitetit dhe uljen e konsumit final të energjisë në ndërtesa, në industri, shërbime dhe aktivitete të tjera të pushtetit qendror dhe njësive vendore me fokus në sistemet e furnizimit me ujë, trajtimin e ujërave të zeza, ndriçimin publik, transportin publik, etj. Për këtë arsye, programi i reformave ekonomike 2024 – 2026, kërkon edhe investime në ngritjen e kapaciteteve, aktivitete ndërgjegjësuese për eficiencën e energjisë, por edhe mbështetje financiare.

Aktualisht, stimujt për eficiencën e energjisë që janë në fuqi, përfshijnë një skemë të subvencionimit të familjeve për instalimin e paneleve diellore për ngrohjen e ujit, përmirësimin e efikasitetit të energjisë për ndërtesat arsimore dhe publike. Paralelisht, në tetor 2022, qeveria prezantoi objektivat e detyrueshme të kursimit të energjisë 15% për sektorin publik, ndërsa Bashkia e Tiranës po mbështet gjithashtu banorët vendas me grante deri në 50% të kostove të termoizolimit për shtëpitë e tyre.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.