ISTAT: Lindjet në Itali drejt rekordeve të reja në vitin 2023!

Lindjet në Itali po shkojnë drejt një niveli të ri rekord këtë vit, sipas të dhënave paraprake që tregojnë për një thellim të krizës demografike të gjatë të vendit.

Mes janarit dhe qershorit ka pasur 3500 lindje më pak se në të njëjtën periudhë të vitit 2022, treguan të dhënat nga Byroja Kombëtare e Statistikave ISTAT.

Në vitin 2022 në tërësi, lindjet ranë 1.7% në 393,000, një rënie e 14-të radhazi dhe numri më i ulët që nga bashkimi i vendit në 1861.

Kryeministrja Giorgia Meloni këtë muaj caktoi rreth 1 miliard euro (1.05 miliardë dollarë) për masat që synojnë adresimin e krizës, të nxitur pjesërisht nga përpjekjet e grave italiane për të kombinuar punën dhe amësinë dhe e konsideruar një emergjencë kombëtare për ekonominë e tretë më të madhe të zonës euro.

Një popullsi në tkurrje dhe në plakje çon në rënie të produktivitetit dhe kosto më të larta të mirëqenies në një vend që tashmë ka faturën më të lartë të pensioneve shtetërore në Organizatën për Bashkëpunim Ekonomik dhe Zhvillim (OECD) prej 38 vendesh.

ISTAT tha në raportin e tij se bazuar në të dhënat nga janari në qershor, shkalla e lindshmërisë në vitin 2023 ka të ngjarë të ulet në 1.22 fëmijë për grua nga 1.24 në 2022.

Shkalla është rritur nga emigrantët, ndërsa tek gratë me kombësi italiane ishte vetëm 1.18 në 2022.

Gjetje të tjera në raportin e ISTAT-it treguan se mesatarisht gratë në Itali kanë fëmijën e tyre të parë në moshën 31 vjeç dhe se vitin e kaluar 41.5% e foshnjave kanë lindur nga gra të pamartuara.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.