Italia e “dëshpëruar” për të ringjallur resortet e skive – Moti i ngrohtë dhe mungesa e ujit për dëborën artificiale “prishin” sezonin

Përpjekjet e Italisë për të ringjallur pistat e saj të skive pa dëborë po rezultojnë të kota. Në Monte Cimone, një vendpushim popullor skish në malet Apenine të Italisë, u investuan 5 milionë euro në prodhimin e dëborës artificiale përpara sezonit të dimrit, në një përpjekje për të shmangur ndikimin e ngrohjes globale.

Por kjo rezultoi e padobishme, sepse pikat e ujit që lëshohen në ajër kanë nevojë për mot të ftohtë që të bien në tokë si dëborë. Deri në mes të janarit temperatura nuk ra kurrë nën zero Celsius. Rezortet u mbyllën, instruktorët e skive dhe punëtorët sezonalë nuk kishin çfarë të bënin dhe u shënua një humbje prej 40 % e të ardhurave për të gjithë sezonin. Krishtlindjet e kaluara ishin të parat në 4 vjet që gjithcka qëndroi e mbyllur.

Rritja e temperaturave kërcënon industrinë e skijimit në mbarë botën, por Italia, me shumë nga vendpushimet e saj me lartësi relativisht të ulëta në Apenine si dhe në Alpe, është veçanërisht e prekur keq. Rreth 90 % e pistave të Italisë mbështeten në dëborë artificiale, krahasuar me 70% Austri, 50% në Zvicër dhe 39% në Francë, sipas të dhënave nga lobi italian i Gjelbër Legambiente.

Pasojat kërcënojnë mjedisin, ekonominë dhe jetesën lokale. Ndërkohë dëbora artificiale po ‘shtrydh’ furnizimet e ngushta të ujit të Italisë. Rritja e temperaturave në Europë po sjell thatësirë ​​dhe Italia nuk mund të përballojë miliona metra kub ujë që përdor çdo vit për të bërë dëborë. Legambiente vlerëson se konsumi vjetor i ujit në pistat alpine të Italisë së shpejti mund të jetë i njëjtë me atë që shpenzon një qytet me një milion banorë, siç është Napoli.

Energjia e konsumuar nga një bateri që shpenzon gjithnjë e më shumë për të krijuar dëborën, është gjithashtu e tepruar. Fuqia e nevojshme për të siguruar borë artificiale në të gjitha vendpushimet alpine të Europës do të ishte e barabartë me konsumin vjetor të 130 mijë familjeve me katër anëtarë. Pasojat ekonomike janë të shumta. Sektori i skive në Itali punëson drejtpërdrejt ose indirekt 400 mijë njerëz dhe gjeneron xhiro prej 11 miliardë eurosh, sipas të dhënave të Anef, e barabartë me rreth 0.5% të prodhimit kombëtar.

Italia filloi të zhvillonte makina artificiale të borës rreth vitit 1990 pas dy vitesh pothuajse pa borë në Alpe. Tani është një lider botëror. Një nga prodhuesit kryesorë të saj, TechnoAlpin, furnizoi Lojërat Olimpike Dimërore 2022 në Pekin. Disa ekonomistë dhe klimatologë argumentojnë se përpjekja për të mbajtur në biznes vendpushimet e skive në lartësi të ulët është e destinuar të dështojë dhe dëbora artificiale thjesht po shtyn në kohë të pashmangshmen.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.