Ja sa paguan secili shtet europian familjet për të pasur një fëmijë!

Sipas një sondazhi të ri, paratë janë shqetësimi më i madh që i pengon të rinjtë në Britani të krijojnë familje. Më shumë se gjysma (59 %) e të anketuarve përmendën shqetësimet financiare si arsyen numër një pse ata do të mendonin të vononin ose të vendosnin të mos kishin fëmijë.

Hulumtimi, i porositur nga Apryl, një kompani e përfitimeve të fertilitetit me bazë në Mbretërinë e Bashkuar, zbuloi se pengesa më e madhe për të qenë prindër ishte rritja e kostos së jetesës, e cituar nga 29 % e të anketuarve. Ajo u pasua nga kostoja e kujdesit për fëmijët (13 %), mostakimi ende i partnerit të duhur (12 %) dhe pamundësia për të blerë shtëpinë e tyre (11 %).

Sondazhi, i kryer nga Censuswide midis 2,000 të rriturve në Mbretërinë e Bashkuar të moshës 18-35 këtë muaj, zbuloi gjithashtu se dy të tretat e të anketuarve do të konsideronin ngrirjen e vezëve, spermës ose embrioneve të tyre për të zgjatur fertilitetin e tyre nëse mund ta përballonin atë.

Ngrirja e vezëve, një praktikë mjekësore për ruajtjen e fertilitetit të një gruaje, dihet se është e kushtueshme – dhe përdorimi i saj është rreptësisht i kufizuar në disa vende si Franca. Kostoja tipike e një cikli të vetëm të ngrirjes së vezëve në Mbretërinë e Bashkuar dhe BE fillon nga rreth 3,000 euro, të cilave duhet të shtohet kostoja e shkrirjes së mëvonshme të vezëve për fekondim in vitro (IVF) – procedura të cilat mund të arrijnë një total prej 10,000 euro ose më shumë.

Një koktej toksik i plakjes së popullsisë dhe rënies së lindjeve në të gjithë Europën tashmë po vë në pikëpyetje qëndrueshmërinë e sistemeve të sigurimeve shoqërore.

Shkalla mesatare e lindshmërisë në BE, me 1.50 lindje të gjalla për grua në vitin 2020, është shumë më poshtë se niveli i zëvendësimit prej rreth 2.1 lindje për grua që nevojitet për të siguruar një popullsi gjerësisht të qëndrueshme në mungesë të migrimit.

Vendet europiane kanë dalë me strategji të ndryshme për të inkurajuar gratë që të kenë më shumë fëmijë. Një nga më të zakonshmet është t’u jepet familjeve një “bonus për fëmijë” – një shpërblim në para për çdo fëmijë që ata kanë.

Britania ofron përfitime të ndryshme për të inkurajuar çiftet të kenë fëmijë. Përfitimet e fëmijëve, për shembull, ofrojnë 21,80 paund (24,87 euro) në javë për fëmijën e parë dhe 14,45 paund (16,48 euro) në javë për çdo fëmijë pas kësaj.

Qytetarët mund të kërkojnë gjithashtu Grantin e Maternitetit për fillimin e sigurt, një pagesë e njëhershme prej 500 paund (571 euro) për të ndihmuar me kostot e lindjes së një fëmije. Prindërit ose kujdestarët mund të kërkojnë gjithashtu kredi tatimore dhe kredi universale, një përfitim që i lejon ata të kërkojnë deri në 85 për qind të kostove të kujdesit për fëmijët.

Diku tjetër në Europë, Finlanda njihet si ndër më bujaret. Midis 2012 dhe 2022, një nga komunat më të vogla të vendit, Lestijärvi, u bë e famshme për dhënien e 10,000 euro për çdo të porsalindur në një thirrje të dëshpëruar për të fuqizuar shkallën e lindjeve në qytet.

Ushtruesi i detyrës së kryetarit të bashkisë, Markku Vehkaoja, tha se skema kishte përfunduar vitin e kaluar sepse shumë nga familjet që merrnin ndihmën financiare po i merrnin paratë dhe më pas po shpërnguleshin diku tjetër.

Në Hungari, klinikat e fertilitetit konsiderohen “me rëndësi strategjike kombëtare” nga kryeministri i ekstremit të djathtë të vendit Viktor Orbán.

Çiftet e reja të martuara në Hungari gjithashtu mund të kërkojnë nga banka një hua deri në 10 milionë forinta (rreth 30,000 euro), të ndalojnë pagesën e interesit për të nëse kanë një fëmijë brenda pesë viteve dhe të shohin kredinë të fshihet plotësisht nëse kanë të paktën tre fëmijë. Ndërkohë, gratë që kanë katër fëmijë janë të përjashtuara përgjithmonë nga tatimi mbi të ardhurat.

Në Greqi, një bonus prej 2000 euro i jepet çdo nëne që lind dhe banon ligjërisht dhe përgjithmonë në vend. Në Itali, prindërit mund të kërkojnë një ndihmë lindjeje deri në 192 euro për fëmijë në muaj, në varësi të të ardhurave të familjes së tyre.

Në Spanjë, projektligji i buxhetit për vitin 2023 do të përfshijë, ndër masat e tjera, një pagesë mujore prej 100 eurosh për nënat me fëmijë nën moshën tre vjeç.

Edhe Franca njihet për shpenzimet e saj të bollshme në politikën familjare, me rreth 4 për qind të produktit të brendshëm bruto (PBB) të dedikuar për përfitime të tilla si leja prindërore e paguar, shtesa familjare dhe kujdesi i subvencionuar për fëmijët.

Vendi ofron disa lloje të mbështetjes. Në varësi të të ardhurave të tyre, familjet me tre fëmijë mund të marrin deri në 594 euro në muaj ndihmë familjare. Ata gjithashtu marrin ndihmë financiare për të paguar për kujdesin e fëmijëve. Shuma, bazuar në të ardhurat bruto vjetore të prindërve ose nënave beqare, mund të shkojë deri në 647 euro në muaj.

Interesant është fakti se Franca është gjithashtu kampione e fertilitetit të Europës, me 1.83 lindje për grua.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.