Kamala Harris, takim me CEO të teknologjisë – Tema e ditës, zhvillimi i inteligjencës artificiale

Zëvendëspresidentja amerikane Kamala Harris do të takohet me shefat ekzekutivë të Google, Microsoft, OpenAI dhe Anthropic për të diskutuar rreth zhvillimit të përgjegjshëm të inteligjencës artificiale. Lajmi u konfirmua për mediat amerikane nga Shtëpia e Bardhë.

Harris do të adresojë nevojën për masa mbrojtëse që mund të zbusin rreziqet e mundshme të IA si dhe të theksojnë rëndësinë e inovacionit etik dhe të besueshëm.

Zyrtarët planifikojnë të angazhohen në një “diskutim të sinqertë” me drejtorët ekzekutivë rreth inteligjencës artificiale, veçanërisht në lidhje me rreziqet që rrjedhin nga zhvillimi “aktual dhe afatshkurtër” i teknologjisë. Inteligjenca artificiale gjeneruese ka zënë një vend të rëndësishëm në jetën e përditshme pasi OpenAI publikoi chatbotin e ri viral të quajtur ChatGPT në fund të vitit të kaluar.

Në muajt që pasuan, Microsoft ka integruar teknologjinë gjeneruese të OpenAI në shumë prej produkteve të tij si pjesë e investimit të tij shumëvjeçar, shumë miliarda dollarësh në kompani. Google lançoi një chatbot gjenerues konkurrues të quajtur Bard në shkurt dhe Anthropic njoftoi chatbot-in e tij, Claude, në mars.

Ndërsa shumë ekspertë janë optimistë për potencialin e IA gjeneruese, teknologjia ka krijuar gjithashtu pyetje dhe shqetësime nga rregullatorët dhe gjigantët e industrisë së teknologjisë. Geoffrey Hinton, i njohur për disa në industrinë e teknologjisë si “kumbari i IA”, la postin e tij në Google, pas një kohe të gjatë, pjesërisht për shkaj të shqetësimeve rreth kërcënimit të mundshëm të IA. Elon Musk ishte një nga më shumë se 27 mijë personat që nënshkruan një letër të hapur në mars, me të cilën u bëhej thirrje laboratorëve të IA që të ndalonin zhvillimin.

Shtëpia e Bardhë tha se takimi i së enjtes është pjesë e përpjekjes më të gjerë i administratës Biden për t’u angazhuar me ekspertë në lidhje me teknologjinë dhe për të siguruar që produktet e IA janë të sigurta përpara se të shpërndahen në publik.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.