Vendet e pasura, në mbrojtje të klimës – Mbështetje financiare prej 100 miliardë dollarësh brenda vitit

Vendet e pasura janë në rrugën e duhur këtë vit për të përmbushur premtimin e tyre të vonuar për financimin e klimës me një shumë prej 100 miliardë dollarësh për vendet në zhvillim, tre vjet më vonë se sa ishte premtuar. Deklarata u bë nga ministrja e Jashtme e Gjermanisë Annalena Baerbock.

Vendet donatore u takuan për të diskutuar përparimin e zotimit të tyre, të bërë në vitin 2009, për të transferuar 100 miliardë dollarë në vit nga viti 2020 në shtetet e cënueshme të goditura nga ndikimet gjithnjë e më të rënda të ndryshimeve klimatike.

Sipas saj, lajmi i mirë është se duket që të gjithë janë në rrugën e duhur për të arritur më në fund shumën prej 100 miliardë dollarësh këtë vit. Konfirmimi u bë në një takim në Berlin me më shumë se 40 përfaqësues për të diskutuar përpjekjet për të trajtuar ndryshimet klimatike.

100 miliardë dollarët janë shumë më pak se nevojat aktuale të kombeve të varfra, por janë bërë simbolikë e dështimit të vendeve të pasura për të ofruar fondet e premtuara për klimën. Dështimi për të përmbushur atë ka nxitur mosbesim në negociatat për klimën midis vendeve për përpjekjet rreth shtimit të masave për uljen e dioksidit të karbonit.

Ekonomitë në zhvillim thonë se nuk mund të përballojnë uljen e emetimeve të dioksidit të karbonit pa më shumë mbështetje nga vendet e pasura përgjegjëse për pjesën më të madhe të gazeve serë që ngrohin planetin.

Vendet e pasura dhanë 83.3 miliardë dollarë në vitin 2020, 16.7 miliardë dollarë më pak se objektivi, sipas të dhënave më të fundit të disponueshme të OECD. Organizata për Bashkëpunim dhe Zhvillim Ekonomik dhe vendet e pasura kishin treguar më parë se qëllimi mund të përmbushej këtë vit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.