Kompensim për transportin rrugor – Kostot e personelit, energjisë, riparimit mund të ndahen mes bashkive dhe operatorëve

Ministria e Infrastrukturës dhe Energjisë ka përcaktuar kushtet e kompensimit për kompanitë e shërbimit publik të transportit rrugor, duke përfshirë transportin qytetëts, rrethqytetetës, ndërqytetës dhe atë ndërkombëtar.

Udhëzimi përcakton kushtet sipas të cilave autoritetet përgjegjëse, kur vendosin ose kontraktojnë detyrimet e shërbimit publik, kompensojnë operatorët e shërbimit publik për kostot e pësuara/shpenzimet e kryera apo japin të drejta ekskluzive në këmbim të kryerjes së detyrimeve të shërbimit publik.

Modalitete e kompensimit do të përcaktohen në kontratat që do të lidhen midis bashkive dhe operatorëve të transportit. Në kontratë, do të duhet të vendoset paraprakisht, në mënyrë objektive dhe transparente parametrat mbi bazën e të cilëve do të llogaritet pagesa e kompensimit, nëse ka; dhe shtrirja e çdo të drejte ekskluzive të dhënë, në një mënyrë që parandalon mbikompensimin.

Po ashtu, në kontratë do përcaktohen modalitetet e ndarjes së kostove që lidhen me ofrimin e shërbimeve. Këto kosto mund të përfshijnë, veçanërisht, kostot e personelit, të energjisë, të infrastrukturës, të mirëmbajtjes dhe të riparimit të mjeteve të transportit publik, të mjeteve lëvizëse dhe të instalimeve të nevojshme për funksionimin e shërbimeve të transportit të udhëtarëve, kostot fikse dhe një kthim të përshtatshëm të kapitalit.

Sipas udhëzimit, kohëzgjatja e kontratave të shërbimeve publike nuk i kalon dhjetë vjet për shërbimet e transportit rrugor me autobus, ndërkohë që duke marrë në konsideratë amortizimin e aseteve, kohëzgjatja e kontratës të shërbimit publik mund të zgjatet maksimumi me 50%.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.