Kompensimi fizik i pronarëve, në 7 vite vetëm 713 hektarë – Zbardhen të dhënat nga viti 2016, ATP ka shpërndarë një sipërfaqe shumë të vogël toke

Ndërsa procesi i kompensimit financiar të pronarëve mund të konsiderohet i dështuar, e njëjta gjë mund të thuhet edhe sa i përket kompensimit përmes fondit fizik që Agjencia e Trajtimit të Pronave ka në dispozicion për këtë qëllim. Scan Televizion ka zbardhur të dhënat zyrtare të këtij procesi që prej vitit 2016. Rezulton se nga hyrja në fuqi e Ligjit Nr. 133 përTrajtimin e Pronave, ATP ka shpërndarë nga Fondi Fizik i Pronave një sipërfaqe prej 713.22 Ha, me një vlerë financiare prej 1,4 miliardë lekësh, afërisht 14 milionë dollarësh.

Më specifikisht, Gjatë vitit 2016 u shpërnda një sipërfaqe prej 658,899 m2 (65.9 Ha) me një vlerë financiare prej 140 milionë lekësh. Gjatë vitit 2017 u shpërnda një sipërfaqe prej 2,575,064 m2 (257.5 Ha) me një vlerë financiare 522 milionë lekë. Gjatë vitit 2018 u shpërnda një sipërfaqe prej 568,909 m2 (56.9 Ha) me një vlerë financiare prej 11,6637,991 lekë. Gjatë vitit 2019 u shpërnda një sipërfaqe prej 2,319,678.46 m2 (231.97 Ha) me një vlerë financiare prej 479 milionë lekësh. Gjatë vitit 2020 u shpërnda një sipërfaqe prej 1,009,645.20 m2 (100.96 Ha) me një vlerë financiare prej 196 milionë lekësh. Gjatë vitit 2021 dhe 2022 nuk është shpërndarë sipërfaqe nga Fondi Fizik për shkak të pezullimit të ekzekutimit të vendimeve në pritje të ndryshimeve të Ligjit Nr. 133/2015.

E njëjta gjë po ndodh edhe të paktën muajt e parë të këtij viti. ATP nuk po ezkekuton as kompensimet financiare, as ato nga fondi fizik i tokës. Kjo megjithëse në fund të vitit të shkuar u miratuan nga Kuvendi edhe ndryshimet e detyruara nga Gjykata Kushtetuese në Ligjin e trajtimit të pronave. Vetë ATP bën me dije se pengesë tashmë është bërë ndërhyrja te aktet nënligjore, të ciolat duhet të përshtaten me ndryshimet në ligjin e pronave.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.