Konfiskimi i aseteve ruse – Perëndimi mund të humbasë 288 miliardë dollarë

Sipas të dhënave më të fundit të disponueshme, investimet direkte të Bashkimit Europian, G7, Australisë dhe Zvicrës në ekonominë ruse arritën në 288 miliardë dollarë në fund të vitit 2022. BE ka 223.3 miliardë dollarë asete, nga të cilat Qipro zotëron 98.3 miliardë dollarë, Holanda 50.1 miliardë dollarë dhe Gjermania 17.3 miliardë dollarë.

Dhe është pikërisht 288 miliardë euro shuma që perëndimi do të humbasë nëse asetet ruse konfiskohen. Agjencia shtetërore ruse e lajmeve RIA ka llogaritur se Perëndimi do të humbiste asete dhe investime me këtë vlerë nëse konfiskonte asetet e ngrira ruse për të ndihmuar në rindërtimin e Ukrainës.

Pasi presidenti Putin dërgoi forcat në Ukrainë në shkurt 2022, SHBA dhe aleatët e saj ndaluan transaksionet me bankën qendrore të Rusisë dhe ministrinë e financave, duke bllokuar rreth 300 miliardë dollarë asete sovrane ruse në Perëndim.

Zyrtarët amerikanë dhe britanikë kanë punuar muajt e fundit për të rifilluar përpjekjet për të konfiskuar asetet ruse të palëvizshme në Belgjikë dhe qytete të tjera europiane, në mënyrë që të ndihmojnë rindërtimin në Ukrainë, pjesë të së cilës janë në rrënoja. Ata shpresojnë se liderët e G7-ës do të bien dakord të lëshojnë një deklaratë më të fortë kur të takohen në fund të shkurtit, rreth përvjetorit të dytë të pushtimit të Ukrainës nga Moska.

Rusia ka akuzuar Uashingtonin se po përpiqet të forcojë vendet në Europë, ku janë shumica e aseteve ruse, për të nënshkruar masa të ngjashme, duke shtuar se Kremlini ka një listë të aseteve të SHBA-së, Europës dhe të tjera që do të konfiskohen nëse vendet perëndimore vazhdojnë në këtë drejtim. Pesë investitorët kryesorë europianë në ekonominë ruse përfshinin gjithashtu Francën me asete dhe investime me vlerë 16.6 miliardë dollarë dhe Italinë me 12.9 miliardë dollarë.

Ndër vendet e G7-ës, përmendet Britania si një nga investitorët më të mëdhenj, duke cituar të dhëna në fund të vitit 2021, të cilat treguan se asetet britanike në Rusi kapnin vlerën e rreth 18.9 miliardë dollarëve. Shtetet e Bashkuara të Amerikës kishin 9.6 miliardë dollarë asete ruse në fund të 2022, Japonia 4.6 miliardë dollarë dhe Kanadaja 2.9 miliardë dollarë.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.