Korporatat rrëzojnë bursat europiane – Siemens rritet me 6%, ndërsa Burberry bie me 8%

Bursat europiane po qëndrojnë në rënie të lehtë në sesionin e sotëm, pasi është zbehur vrulli pas të dhënave pozitive në SHBA dhe në Kinë, më herët gjatë javës. Indeksi pan-Europian Stoxx 600 po qëndron në rënie me rreth 0.4%, ndërsa sektori i naftës dhe gazit kryeson fitimet, në rritje me 1.3%. Ngdalësimi i inflacionit në SHBA për tetorin rriti shpresat se Rezerva Federale po i afrohet fundit të ciklit të rritjes së normave të interesit.

Edhe nga Kina pati të dhëna pozitive ekonomike, e cila raportoi se shitjet me pakicë rezultuan më mirë se parashikimet e analistëve. Ndër zhvillimet e tjera, presidenti amerikan, Joe Biden dhe presidenti i Kinës, Xi Jinping u takuan personalisht në San Francisko të mërkurën, duke shënuar takimin e parë në rreth një vit. Udhëheqësit ranë dakord të rifillojnë komunikimin ushtarak të nivelit të lartë, por çështja e Tajvanit mbetet një pengese. Në konferencën për mediat pas bisedimeve, Biden përsëriti qëndrimin e SHBA se Tajvani ruan sovranitetin e tij, pavarësisht pretendimeve të Kinës për të kundërtën.

Pekini e konsideron Tajvanin pjesë të territorit të tij, pa të drejtë të zhvillojë në mënyrë të pavarur marrëdhëniet diplomatike. Ndërkohë, fitimet e korporatave vazhdojnë të nxisin lëvizjen e çmimeve të aksioneve individuale në Evropë, me Siemens që është në rritje me rreth 6%, pasi kompania gjermane raportoi një rritje të të ardhurave me 10% për tremujorin e katërt fiskal, në një rekord prej 21.4 miliardë euro.

Në anën tjetër, aksionet e kompanisë Hellofresh ranë me mbi 20% në sesionin e sotëm, pasi kompania gjermane uli parashikimin për fitimet vjetore, si pasojë e rritjes së ngadaltë të shitjeve dhe rritjes së kostove në Amerikën e Veriut. Edhe aksionet e Burberry kanë rënë me rreth 8%, pasi kompania britanike e modës paralajmëroi se nuk do të realizojë objektivin e saj të të ardhurave për të gjithë vitin, për shkak të rënies së shpenzimeve në rang global.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.