Kreditimi në Kosovë, me “frena dore” – Në janar-qershor, më e ulëta se një vit më parë. Norma mesatare, 6,5%

Aktiviteti kreditues në Kosovë shënoi rritje vjetore prej 14.5% në gjysmën e parë të vitit, që përkon me shkallë më të ulët të rritjes krahasuar me një vit më parë. Sipas një publikimi të Bankës Qendrore të Kosovës, dinamikat e kreditimit gjatë kësaj periudhe përgjithësisht reflektojnë qasje më të kujdesshme të konsumatorëve në marrjen e borxheve shtesë për shkak të rritjes së kostos së jetesës dhe njëkohësisht, qasje dhe monitorim më të kujdesshëm të bankave në kredidhënie.

Segmenti i korporatave jofinanciare shënoi rritje vjetore të stokut të kredive prej 12.9%, ndërsa, huatë për ekonomitë familjare shënuan rritje vjetore prej 16.8%. Kreditë e reja në gjysmën e parë të vitit 2023 shënuan përgjysmim të shkallës së rritjes në 9%, nga 18.5% rritje në periudhën e njëjtë të vitit paraprak. Sektori i ndërmarrjeve u karakterizua me ngadalësim të normës së rritjes vjetore të kredive të reja, ndërsa ai i ekonomive familjare shënoi rritje të përshpejtuar krahasuar me vitin paraprak.

Në kuadër të kredive për korporatat jo financiare, sektori i tregtisë është më i kredituari ndër vite, pasuar nga ai i prodhimit dhe ndërtimit, të cilët janë zgjeruar gradualisht në vitet e fundit duke rritur pjesëmarrjen në totalin e huave të bankave.

Në qershor të këtij viti, norma e interesit në kredi arriti në 6.5%, kundrejt 6% në qershor 2022. Norma mesatare e interesit në kredi ndaj korporatave jofinanciare në qershor 2023 qëndroi në 6.8%, për 0.7 pikë përqindje më e lartë se në periudhën e njëjtë të një viti më parë. Norma më të favorshme të interesit në kredi u ofruan për sektorin e industrisë (6.4%), ndërsa norma më e lartë mesatare e interesit ishte për sektorin e bujqësisë prej 6.8%.

Norma mesatare e interesit në kredi ndaj ekonomive familjare arriti në 6.1%, për 0.2 pikë përqindje më e lartë se e njëjta periudhë e një viti më parë. Normat më të favorshme të interesit janë aplikuar për kreditë hipotekare në mesatare prej 5.4 përqind, duke qenë se konsiderohen me rrezik më të ulët. Kurse, kreditë konsumatore vazhdojnë të kenë norma më të larta të interesit prej mesatarisht 6.3%.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.