Kryeministri i Spanjës: Europa mund të mësojë nga Ligji i Biden për Reduktimin e Inflacionit!

Kryeministri spanjoll Pedro Sanchez u shpreh se Bashkimi Europian ka diçka për të mësuar nga Uashingtoni dhe politikat e tij të reja për të luftuar inflacionin, duke thënë se ai shpreson që një luftë tregtare midis dy palëve mund të shmanget.

“Ne duhet të mësojmë,” tha Sanchez kur u pyet për Aktin e Reduktimit të Inflacionit, të cilin SHBA shpreson ta bëjë atë vendin e duhur për investime të gjelbra. “Ne duhet të reformojmë disa aspekte të brendshme të politikave tona industriale, si ndihma shtetërore, reduktimi i burokracisë dhe përpjekjet për të dërguar një mesazh për industrinë në mbarë botën se është Europa, dhe sigurisht Spanja, që është një vend i mirë për t’u vendosur,” shtoi ai.

Legjislacioni gjithëpërfshirës i SHBA, i cili u miratua nga ligjvënësit amerikanë në gusht dhe përfshin një shpenzim rekord prej 369 miliardë dollarësh për politikat e klimës dhe energjisë, ka marrë disa përgjigje të zemëruara midis 27 vendeve të BE-së. Komisioni Europian, krahu ekzekutiv i BE-së, ka thënë më parë se ka “shqetësime serioze” në lidhje me hartimin e stimujve financiarë në paketë.

BE-ja ka renditur pika në Aktin e SHBA-së për Reduktimin e Inflacionit që beson se mund të jenë në shkelje të rregullave të tregtisë ndërkombëtare. Një nga pengesat më të mëdha për europianët është kreditimi i taksave të dhëna për makinat elektrike të prodhuara në Amerikën e Veriut. Kjo mund të sjellë sfida për prodhuesit europianë të makinave që janë duke u fokusuar në EV, si Volkswagen.

Ka pasur sugjerime se Uashingtoni mund të gjejë mënyra që firmat europiane të kenë akses në këto subvencione të gjelbra, por kjo ka zemëruar më tej disa politikanë europianë. Kryeministri i Belgjikës, Alexander De Croo, për shembull, kohët e fundit akuzoi SHBA-në për një fushatë “agresive” për të joshur kompanitë në brigjet e saj me këto masa.

“Shpresoj që jo,” tha Sanchez kur u pyet për mundësinë e shpërthimit të një lufte tregtare midis SHBA-së dhe BE-së. “Unë mendoj se ne duhet të kemi atë dialog për të arritur një marrëveshje,” tha ai. “Unë mendoj se kjo luftë [Rusi-Ukrainë] na tregon gjithashtu rëndësinë e unitetit në anën e mbrojtjes, por edhe në anën ekonomike brenda vendeve perëndimore,” shtoi ai.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.