Kur jepen më shumë koncesione në Shqipëri? – Analiza e kontratave: Pjesa më e madhe janë ‘gaz dhe energji” 

Ministria e Financave në raportin e fundit të nëntorit të 2022, ka pranuar se ka dështuar në monitorimin e kontratave koncensionare. E për rrjedhojë ende nuk dihet se sa është një kosto totale e shpenzuar për kontratat e PPP, në periudha të caktuara kohore. Shqetësim për këtë çështje ka pasur edhe Fondi Monetar Ndërkombëtar e tashmë po përgatitet edhe një ligj i ri për koncesionet.

Por çfarë koncesionesh ka dhënë Shqipëria në këto vite?

Kjo procedurë ka nisur në vitin 2004 por ka njohur një intensitet të shtuar në vitet vijuese. Nese analizojmë vitet kur janë miratuar kontratat koncesionare, ajo që bie në sy është fakti se numri më i madh i tyre është dhënë në periudhë zgjedhore, përkatësisht në vitin 2009 dhe 2013.

Numerikisht, pjesa më e madhe e koncesioneve janë në fushën e energjisë dhe gazit ku numërohen 224 të tilla, duke u pasuar me transportin me 26 kontrata.

Ndërkaq, autoritetet kontraktuese që kryesojnë për nga numri më i lartë i kontratave koncensionare janë Ministria e Ekonomisë, dikur e përfshirë me Energjinë, me 64%, ndërsa Ministria e Infrastrukturës mbetet e dyta në radhë me 14% të kontratave koncensionare.

Në listën e kontratave të publikuara në regjistrin e koncesioneve, koncesioni më i kushtueshëm është ai i Devollit, pasuar nga Rruga e Arbrit.

Diamila Leka / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.