Kush është Fabio Panetta? – Guvernatori i ri i Bankës Qendrore të Italisë nis detyrën më 1 nëntor 2023  

Me propozimin e kryeministres, Giorgia Meloni dhe mbështetjen unanime të këshillit të lartë të Bankës së Italisë, Fabio Panetta është emëruar guvernator i Bankës Qendrore dhe do të marrë zyrtarisht postin më 1 nëntor 2023. Guvernatori aktual, Ignazio Visco, e përfundon mandatin e tij më 31 tetor duke qendruar në krye të Bankës qendrore për 12 vite.

Panetta ka një eksperiencë të gjatë në këtë institucion: nga 2019 deri në 2020 ai ishte menaxher i përgjithshëm i Bankitalia. Nga viti 2012 deri në vitin 2019 ka qenë anëtar i Drejtorisë dhe Zëvendësdrejtor i Përgjithshëm, ku më parë ka qenë Drejtor Qendror për Eurosistemin dhe Stabilitetin Financiar dhe Drejtues i Shërbimit të Studimeve të Situatës Ekonomike dhe Politikës Monetare.

Emërimi i Guvernatorit bëhet me dekret të Presidentit të Republikës, me propozimin e Këshillit të Ministrave, pasi ka dëgjuar mendimin e Këshillit të lartë të Bankës. Ky i fundit, një organ i përbërë nga Guvernatori dhe 13 Këshilltarët e lartë, mblidhet pa praninë e Guvernatorit për të dhënë këtë mendim.

Largimi i tij nga Banka Qendrore europiane hap një vend në Bordin Ekzekutiv prej 6 anëtarësh të këtij institucioni, që sipas traditës duhet të vazhdojë të mbahet nga një përfaqësues i Italisë.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.