Kush “fshihet” pas kompanive ‘offshore’ të kontratave publike? Koncesionet në sitë. Synim identifikimi i pronarëve në parajsa fiskale

Në Kuvend është depozituar një nismë ligjore që synon të rrisë transparencën e atyre që përfitojnë nga fondet publike. Në ligjin aktual, lejohet që një pjesë e kuotave aksionarë të kompanive që përfitojnë fonde publike, marrin pjesë në tenderë apo kanë kontrata koncesionare, të kenë si përfitues fundorë individë të regjistruar në ndonjë nga parajsat fiskale.

Nisma e Agron Shehajt ka marrë mbështetjen e një grupi deputetësh dhe është kaluar për shqyrtim në Kuvend.

Në relacionin e saj evidentohet se qëllimi është ndalimi i përfitimit të fondeve publike nga operatorë ekonomikë për të cilën nuk është i mundur identifikimi i pronarëve si dhe të ndalojë përfitimin e tyre nga deputetët, zyrtarët, personat e lidhur me ta apo ata që janë të dënuar penalisht.

Nisma ligjore synon zbatueshmërinë e detyrimit të transparencës edhe për kontrata ekzistuese publike të cilat kanë pronarë fundorë të paidentifikueshëm duke mos pasur asnjë informacion në lidhje me përfituesit fiundore të tyre, veçanërisht ato kontrata publike që janë të zgjatura në kohë dhe kanë efekte të konsiderueshme për fondet publike.

Për këto subjekte të cilat nuk janë identifikuar pronarët përfitues, ligji ju jep një afat për deklarimin e tyre apo për ndryshimin e strukturës organizative dhe vedimmarrëse të këtyre me qëllim evidentimin e përfituesve të vërtetë. Në të kundërt do të aplikohen sanksione.

Në propozimin ligjor nuk mohohet synimin që në një të ardhme të afërt edhe ndalimi me ligj i lidhjes së kontratave me fonde publike me kompani guacka (offshore).

Në vitin 2022, në Shqipëri është miratuar ligji “Për regjistrin e pronarëve përfitues”, i ndryshuar, ku synohet t’i jepet zgjidhje situatës së transparencës së kompanive që përfitojnë fonde publike.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.