Lëvizje me karta identiteti në Ballkanin Perëndimor – Nënshkruhen 3 marrëveshje në Berlin, Scholz: Europa kompletohet me këtë rajon

Liderët e Ballkanit Perëndimor nënshkruan këtë të enjte 3 marrëveshje në Samitin i Berlinit të mbajtur në Kancelarinë Federale në Gjermani. Lëvizja e qytetarëve vetëm me karta identiteti është një ndër marrëveshjet më të rëndësishme të arritura e cila i lejon qytetarët të  mos kenë të nevojshme paraqitjen e pasaportës.

Njohjen e diplomave universitare dhe njohjen e kualifikimeve për tre profesione: mjekët, dentistët dhe arkitektët janë dy marrëveshjet e tjera të nënshkruara. Tashmë të diplomuarit nuk do të kenë nevojë të paguajnë më tarifa prej 200 deri 500 euro për njohjen reciproke të diplomave.

Gjatë samitit kancelari gjerman Olaf Scholz u shpreh se premtimi për një të ardhme evropiane është një detyrë që pritet të kthehet në realitet. “Europa mund të kompletohet vetëm me Ballkanin Perëndimor si pjesë të saj. Ju dhe 6 vendet e Ballkanit perëndimor i përkisni demokracisë së lirë dhe të pavarur evropiane. Anëtarësimi juaj është në interesin tone. Stabiliteti dhe prosperiteti i rajonit nuk mund të shkëputet nga stabiliteti dhe prosperiteti i Europës në tërësi.

Një fokus në samit mori dhe kriza energjetike por edhe angazhimi i rajonit për të përshpejtuar zbatimin e Axhendës së Gjelbër për Ballkanin Perëndimor Përveç gjashtë liderëve të rajonit, e pranishme në samit ishte edhe Presidentja e Komisionit Europian Ursula Von Der Leyen, si edhe Presidenti i Këshillit Europian, Charles Michel.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.