Në cilin vit konsumuam më shumë energji elektrike? – Raporti i Entit Rregullator tregon ecurinë në periudhën 2004-2023
Energjia elektrike është burimi kryesor për konsumatorin shqiptar, që nga familjarët e deri të bizneset. Por, si është luhatur konsumi i energjisë ndër vite? Një raport i Entit Rregullator të Energjisë (ERE) ka analizuar ecurinë nga viti 2004 e deri në fund të vitit 2023. Interesant është fakti se konsumi më i ulët i energjisë elektrike i regjistruar në vendin tonë është në vitin 2007, me 5,767,652 MWh, ndërsa konsumi më i lartë në vitin 2021, me 8,414,836 MWh, ku ky i fundit përbën dhe konsumin më të lartë historik në Shqipëri.
Konsumi total i realizuar per vitin 2023 rezulton 7,875,861MWh, në pothuaj në të njejtat vlera sa konsumi i arritur përgjatë vitit 2022. Konsumi i energjisë elektrike për vitin 2023 krahasuar me konsumin e vitit 2021 i cili është dhe konsumi maksimal i arritur rezulton me një ulje prej 538,975 MWh.
Ulja e konsumit të energjisë elektrike total në vend për vitin 2023, krahasuar me konsumin maksimal per vitin 2021, shkon në rreth 6.4%. Në të njëjtën kohë, konsumi i energjisë elektrike total i realizuar për vitin 2023 është rreth 9.2% më i lartë se konsumi mesatar vjetor.
Sipas raportit të Entit Rregullator, kjo ulje e konsumit total të energjisë elektrike është reflektuar për të gjitha kategoritë e konsumatorëve, por veçanërisht për konsumatorët që furnizohen në tregun e parregulluar.
“Kjo ulje e konsumit ka ardhur edhe si pasoje e krizes energjetike ku shumë biznese instaluan impiante alternative të gjenerimit të energjisë si vetëprodhues”, nënvizohet në raportin e ERE. Aktualisht, janë 27 institucione që kanë instaluar panele diellore për qëllime autokonsumatore, si dhe 6 ujësjellës.
Gjatë vitit të kaluar vëmendje iu kushtua edhe kursimit të energjisë, përmes aplikimit të masave të eficiencës së energjisë. Një udhëzim i Ministrisë së Infrastrukturës dhe Energjisë i hapi rrugë krijimit të shoqërive të shërbimeve të energjisë dhe zbatimit të kontratave model që do të lidhen mes tyre dhe subjekteve që do aplikojnë masat e kursimit.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.