Ligji për shkëmbimin e të dhënave në BE – Sipas kompanive, dëmton konkurrencën dhe sigurinë kibernetike

Drejtorët ekzekutivë të disa kompanive kryesore europiane i kanë kërkuar Komisionit të tërheqë frenimin e planeve për të rregulluar përdorimin dhe aksesin e të dhënave të gjeneruara në bllok, duke argumentuar se ato mund të shkaktojnë dëme të qëndrueshme në konkurrencën dhe sigurinë kibernetike të bllokut.

Në një letër dërguar presidentes së Komisionit Ursula von der Leyen dhe Komisioneres së Konkurrencës Margrethe Vestager, ata shkruan për “shqetësimet e tyre të thella” në lidhje me përmbajtjen dhe shpejtësinë e negociatave ndërinstitucionale mbi Aktin e të Dhënave, duke paralajmëruar se legjislacioni mund të rrezikojë lidershipin dhe inovacionin europian në formën e tij aktuale.

Akti Europian i të Dhënave u prezantua nga Komisioni në shkurt 2022 për të krijuar rregulla të harmonizuara për aksesin dhe përdorimin e drejtë të të dhënave në 27 vendet e bllokut. Ai synon të lejojë ndarjen më të lehtë të të dhënave midis bizneseve dhe konsumatorëve, mes bizneseve si dhe bizneseve dhe qeverive. Gjithashtu klientëve u mundësohet të kalojnë në mënyrë efektive midis ofruesve të ndryshëm të shërbimeve të përpunimit të të dhënave.

Komisioni tha në atë kohë se ligji do të krijonte një mjedis digjital të drejtë, do të stimulonte një treg konkurrues të të dhënave, do të hapte mundësi për inovacione të drejtuara nga të dhënat dhe do t’i bënte të dhënat më të aksesueshme për të gjithë.

Por pesë drejtorët ekzekutivë dhe DigitaLEurope, një organizatë tregtare që përfaqëson industritë e transformuara në mënyrë digjitale në të gjithë bllokun, thonë se negociatat e trepalëshe midis Komisionit, deputetëve dhe vendeve anëtare tani po ecin me “shpejtësi të madhe” dhe se ka “pak hapësirë ​​për të diskutuar këto detaje komplekse në thellësi”.

Ata argumentojnë, se detyrimi për të shkëmbyer të dhëna me kompani të tjera jo vetëm që mund t’i shtyjë ata të zbulojnë detaje rreth sistemeve, proceseve ose teknologjive të tyre të brendshme që mund t’i lënë ata të prekshëm ndaj aktorëve keqdashës, por gjithashtu në këtë mënyrë përfitojnë konkurrentët, veçanërisht vendet e treta, operatorëve të të cilave mund të mos u duhet të respektojnë të njëjtat rregulla. “Kjo jo vetëm që minon konkurrencën dhe inovacionin e BE-së, por gjithashtu ngre pikëpyetje në lidhje me udhëheqjen teknologjike të BE,” shkruajnë ata.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.