Linjat ajrore globale dyfishojnë fitimet – Sezoni i verës pritet të jetë shumë i ngjeshur

Linjat ajrore globale dyfishuan parashikimet e tyre të fitimeve për vitin 2023, në 9.8 miliardë dollarë nga 4.7 miliardë dollarë, mbështetur nga kërkesa e madhe për udhëtime ndërsa sektori rimëkëmbet nga pandemia COVID-19.

Drejtori i Shoqatës Ndërkombëtare të Transportit Ajror (IATA), Willie Walsh, tha se,  vitet e pandemisë i përkasin të kaluarës tashmë dhe kufijtë janë të hapur si normalisht. Por marzhet e fitimit, që arrijnë në 1.2%, ishin ende shumë të pakta për të siguruar qëndrueshmërinë financiare afatgjatë të industrisë.

Linjat ajrore globale kanë raportuar muajt e fundit rezultate të forta teksa përgatiten për një sezon veror të ngjeshur, me kërkesën për udhëtime që nuk tregon shenja rënie pavarësisht kulmit të inflacionit. Presioni nga çmimet e naftës është ulur gjithashtu gjatë këtij viti. Nivelet e të ardhurave për vitin 2023 po afrohen gjithashtu me nivelet para pandemisë, duke u ngjitur në 803 miliardë dollarë të pritshëm kundrejt 838 miliardë dollarëve në 2019 – ën.

Sipas Walsh, shumë njerëz jo vetëm që duhet të udhëtojnë, por duan të udhëtojnë dhe do të vazhdojnë ta bëjnë këtë gjatë këtij viti. Ai shtoi se, kërkesa po rritet nga nivelet e larta të punësimit edhe me një perspektivë më të dobët makroekonomike. Kjo situatë ka tendencë t’u japë konsumatorëve besimin se ata mund të shpenzojnë para, dhe se mund të marrin disa borxhe për të vazhduar të shijojnë atë që po bëjnë.

Megjithatë, sfidat e vazhdueshme, të tilla si problemet e zinxhirit të furnizimit dhe rritja e tarifave të aeroportit, po zvarrisin rimëkëmbjen e industrisë. Walsh theksoi se, pavarësisht një rikthimi të fortë në kërkesë, niveli aktual i ulët i përfitueshmërisë së industrisë nuk është i qëndrueshëm dhe sektori po arrin një fitim prej rreth 2.25 dollarë për pasagjer, që është më pak se çmimi i një filxhani kafeje, apo një bilete metroje.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.