“Nuk është arritur ende kulmi në inflacionin bazë” – Lagarde: BQE do të rrisë sërish normat e interesit

Presidentja e Bankës Qendrore Europiane, Christine Lagarde pranoi shenja moderimi në inflacionin bazë në Eurozonë, por ripohoi se ishte shumë herët për ta cilësuar si arritjen e një kulmi në matësin kryesor të rritjes së çmimeve.

Deklaratat e Lagarde synojnë të çimentojnë pritshmëritë e tregut për më shumë rritje të normave të interesit nga BQE-ja këtë dhe muajin e ardhshëm, pavarësisht nga një rënie e mprehtë e inflacionit muajin e kaluar.

Ajo theksoi se të dhënat më të fundit të disponueshme sugjerojnë se treguesit e presioneve themelore inflacioniste mbeten të larta megjithëse disa po tregojnë shenja moderimi, nuk ka asnjë provë të qartë që inflacioni bazë ka arritur kulmin.

Inflacioni në 20 vendet që përdorin euron u lehtësua në 6.1% në maj, nga 7% në prill dhe çmimet bazë, të cilat përjashtojnë ushqimin dhe karburantin dhe që ndiqen nga afër nga BQE, u rritën me vetëm 5.3%, nga 5.6%.

Kjo ka nxitur një debat në lidhje me nevojën për rritje të mëtejshme të normave të interesit nga ana e BQE-së përtej një rritjeje që pritet në takimin e saj të ardhshëm më 15 qershor, i cili ka të ngjarë të çojë totalin në një 4 pikë përqindjeje të paprecedentë në më pak se 12 muaj.

Lagarde pranoi se efektet e rritjes së normave të kaluara kishin filluar të materializoheshin dhe kishin të ngjarë të forcoheshin në vitet e ardhshme. Por ajo ripohoi linjën e BQE-së se normat do të duhet të rriten përsëri në nivele mjaft kufizuese për të ulur inflacionin në objektivin prej 2% të BQE-së dhe se ato do të mbahen në ato nivele për aq kohë sa të jetë e nevojshme.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.