Marrëveshja e pensioneve me Italinë, në Kuvend – Pritet ratifikimi. Do të përfitojnë rreth 200 mijë emigrantë shqiptarë

Pas nënshkrimit në Romë në fillim të muajit shkurt nga dy ministrat e jashtëm, qeveria shqiptare ka dërguar për ratifikim në Kuvend marrëveshjen me qeverinë italiane në fushën e sigurimeve shoqërore. Janë rreth 200 mijë emigrantë shqiptarë, që do të përfitojnë nga marrëveshja, të cilët pas finalizimit të saj, do t’ju krijohet mundësia edhe e transferimit të pensionit në Itali.

Marrëveshja parashikon njohje të periudhave kontributive për efekt pensioni. Konkretisht, për të dalë në pension pleqërie në Itali duhet që të plotësohen 20 vite pune, ndërsa në Shqipëri pragu i vendosur është 15 vite pune. Në mënyrë hipotetike, një qytetarë shqiptarë që ka në total 36 vite pune, nga të cilat 22 vite në Itali dhe 16 në Shqipëri, do të marrë pension në Itali për 22 vite dhe në Shqipëri për 16 vite.

Në nenin 12 të draft marrëveshjes specifikohet se “Nëse një person nuk ka të drejtën për një përfitim për shkak të periudhave të vlefshme, të pamjaftueshme sipas legjislacionit të një Pale, atëherë ajo Palë do të përcaktojë të drejtën  e atij personi për përfitim duke mbledhur periudhat e vlefshme  me kusht që këto periudha të mos mbivendosen”.

Drafti përcakton edhe kriteret në rastet kur nuk plotësohet pragu kontributiv në njërin shtet. Në këto raste, qytetarët do të përfitojnë vetëm pensionin në atë shtet ku plotësojnë kriterin apo kushtin e vjetërsisë në punë.

Përpara se marrëveshja të nis zbatimin duhet që fillimisht të ratifikohet në parlamentet respektivë. Për këtë do të duhet të kalojnë së paku edhe dy muaj të tjerë. Pas ratifikimit dhe botimit në fletoren zyrtare do të nisë edhe zbatimi duke iu dhënë mundësinë emigrantëve të përfitojnë dy pensione, konkretisht një në Shqipëri dhe një në Itali.

Në dispozitat kalimtare bëhet po ashtu e qartë se marrëveshja nuk ka fuqi prapavepruese, ç’ka do të thotë se ata të cilët janë aktualisht në pension nuk janë pjesë e saj, duke nënkuptuar faktin qe perfitues jane vetëm ata që dalin rishtazi në pension.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.