Marrëveshja e shekullit mes Turqisë dhe Izraelit – Furnizimi me gaz i Europës. Greqia “jashtë loje”?!

Sipas raportimeve të mediave, presidenti turk Rexhep Tajip Erdogan dhe kryeministri izraelit Benjamin Netanyahu duhet të takohen në Ankara në fund të korrikut. Ata po takohen jo vetëm për të zbutur marrëdhëniet e tensionuara prej vitesh mes dy vendeve, por edhe për të arritur një marrëveshje të rëndësishme për eksportin e gazit izraelit në Europë përmes Turqisë.

Ankaraja propozon lidhjen e gazit nga fusha Leviathan e Izraelit jo shumë larg nga bregu libanez, rreth 135 kilometra nga Haifa, me Turqinë përmes një tubacioni gazi detar. Përveç kësaj, Izraeli do të rinovonte gjithashtu “kërkimet” jo shumë larg Rripit të Gazës, dhe kjo do të përfshinte vetëqeverisjen palestineze.

Kjo do ta bënte Turqinë shpërndarësin qendror të gazit për Europën, atë që Gjermania synonte për vete “përmes” megagazsjellësve Nord Stream 1 dhe 2, të cilët tashmë janë jashtë funksionit për shkak të konfliktit midis Rusisë dhe Ukrainës.

Domethënë, gazi rus, azerbajxhanas dhe iranian gjithsesi shpërndahet tashmë përmes Turqisë dhe nëse i bashkohet edhe Izraeli, Turqia do të ketë një “eksluzivitet” për furnizimin me gaz në Europë duke nxjerrë jashtë loje Qipron dhe Greqinë, të cilat synonin të ishin shpërndarësit kryesorë të gazit izraelit. Edhet Italia synonte të ishte pjesë e këtij projekti, por gazsjellësi i tyre Lindor-Mesdhetar (EastMed pipeline), me vlerë rreth nëntë miliardë dollarë, është në prag të kolapsit, pra me shumë mundësi nuk do të realizohet.

Gazeta greke ‘Hellas Post’ thekson se anulimi i EastMed dhe marrëveshja mes Izraelit dhe Turqisë do të çonte në forcimin e rolit të Ankarasë në biznesin e gazit, por edhe në eliminimin e Greqisë nga lojërat energjetike.

Ndaj kryeministri i ri, Kyriakos Mitsotakis tashmë është vënë në shënjestër të opozitës, i cili akuzohet për dështimin e atij projekti. Ai projekt u mbështet nga Komisioni Europian dhe SHBA, veçanërisht pas konfliktit midis Rusisë dhe Ukrainës, kur Brukseli vendosi të heqë varësinë e tij nga gazi rus.

Projekti turko-izraelit do të zvogëlonte më tej varësinë nga gazi rus, megjithëse supozohet se Vladimir Putin, i cili mbërrin në Ankara në gusht, mund të ofrojë dërgimin e “tepricave” të gazit që supozohej të shkonin përmes Nord Stream 2 në Europë përmes Turqisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.