Kanadaja rekruton të huaj të kualifikuar – Ditën e parë u regjistruan 10 mijë aplikantë

Qeveria kanadeze po rekruton të huaj me aftësi të larta që punojnë në Shtetet e Bashkuara për t’u transferuar në Kanada, dhe programi ka qenë aq i suksesshëm sa ka arritur objektivin e tij prej 10 mijë aplikantësh brenda ditës së parë.

Qeveria nisi këtë javë një leje të veçantë pune për punëtorët e huaj që tashmë kanë marrë një vizë H-1B në SHBA, të cilët aktualisht janë afro 600 mijë dhe vijnë kryesisht nga India dhe Kina. Kuota 10 mijë e programit u plotësua që në ditën e parë të javës, tha ministri kanadez i Imigracionit, Sean Fraser.

Fraser theksoi se qeveria e tij pa një mundësi me pushimet masive të fundit nga puna në sektorin e teknologjisë në SHBA.

“Ne donim të përfitonim nga mundësia,” tha Fraser. “Viza H1-B ka një veçori unike të integruar që thotë se nëse nuk gjeni marrëveshje alternative për punë brenda 60 ditëve, nuk ju lejohet të qëndroni në Shtetet e Bashkuara të Amerikës”, shtoi Fraser.

Çdo vit, deri në 85 mijë persona zgjidhen për viza H-1B në SHBA, një shtyllë kryesore për gjigantët e teknologjisë si Amazon, Google, Facebook Meta Platforms dhe International Business Machines Corp.

Programi i vizave H-1B u lejon kompanive amerikane të punësojnë punëtorë të huaj në profesione të specializuara në sektorë si teknologjia, inxhinieria dhe mjekësia. Zakonisht, ato lëshohen për tre vjet dhe janë të rinovueshme. Nëse pushohen nga puna ose lirohen nga kompania në SHBA që i sponsorizoi, ata duhet të gjejnë një punë dhe të sponsorizohen brenda 60 ditëve.

Lëvizja vjen pasi një valë pushimesh nga puna ka goditur sektorin e teknologjisë në SHBA. Kompanitë si Meta, Amazon dhe Google kanë bërë shkurtime.

Shërbimi i Shtetësisë dhe Imigracionit të SHBA-së tha se rreth 50 mijë personave iu hoqën vizat H-1B për shkak të humbjes së punës midis tetorit 2022 dhe prillit 2023, dhe rreth 12.500 nuk i transferuan vizat e tyre në ndonjë status tjetër ligjor.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.