Mbetjet ilegale: Polonia i drejtohet BE-së për ‘grindjen’ me Gjermaninë për pretendimet e paligjshme!
Zjarri muajin e kaluar në deponinë në Zielona Gora ka sjellë në qendër të vëmendjes çështjen e menaxhimit të mbetjeve në Poloni. Magazinimi dhe trajtimi joadekuat, së bashku me ngarkesat e paligjshme të mbetjeve janë bërë një problem i madh në vend, thonë vëzhguesit dhe aktivistët mjedisorë.
Zjarri ka rikthyer në rend dite edhe çështjen e mbetjeve ilegale. Pas incidentit, Ministria Polake e Klimës paraqiti një ankesë në Komisionin Europian në lidhje me 35,000 tonë dërgesa të paligjshme mbetjesh nga Gjermania, hapi i parë përpara se të aplikonte në Gjykatën Europiane të Drejtësisë.
“Autoritetet e Republikës Federale të Gjermanisë nuk ndihen të detyruara të mbledhin këto mbetje”, tha Aleksander Brzózka, zëdhënës i ministrisë. “Ne donim ta zgjidhnim këtë çështje jashtë gjykatës, për fat të keq, nuk funksionoi prandaj, sipas ligjit, çdo shtet anëtar i BE-së ka të drejtë të paraqesë një ankesë në KE kundër një shteti tjetër – dhe kështu bëmë. Tani, Komisioni ka tre muaj kohë për të analizuar dhe për t’iu përgjigjur kësaj çështjeje”.
Christopher Stolzenberg nga Ministria Gjermane për Mjedisin tha se kthimi i dërgesave të paligjshme është përgjegjësi e shteteve federale. Ai shtoi, megjithatë, se fakti që po ndodhin dërgesa të paligjshme të mbetjeve nga Gjermania është një shqetësim i madh për ta dhe ministria mbetet e përkushtuar për të përmirësuar parandalimin e dërgesave të paligjshme të mbetjeve në BE.
Vëzhguesit që janë të interesuar për këtë çështje, thonë se problemi është shumë më i madh nga sa e kuptojnë njerëzit: “Tani ka mbi 400 deponi ilegale në vend (Poloni), nga të cilat rreth 140 janë vende ku janë hedhur mbetje të rrezikshme. Zbulohet. Gjithnjë e më shumë gazetarë po e ngrenë këtë temë. Edhe zyrtarët kanë kohë që po luftojnë me këtë, kështu që shpresoj që kjo tendencë për të luftuar krimin mjedisor, në mënyrë rigoroze – lufta kundër mbetjeve të rrezikshme, do të zgjerohet dhe më shumë nga këto do të zbulohen deponitë”.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.