Më shumë vende pune për të rinjtë në Spanjë – Papunësia mbetet një problem kronik sidomos në Europën Jugore

Një rinovim i rregullave të punës në Spanjë është dhe shkaku i një rritjeje prej 142% të të punësuarve të rinj me kontrata të përhershme në një vend ku shkalla e papunësisë mes të rinjve ka qenë një nga më të lartat në Europë që nga kriza financiare globale.

Kjo rritje vërteton se reforma 9 mujore e punës nga ana e qeverisë soacialiste po përmbys regjimin e punësimit dhe largimit të lehtë nga puna, të vendosur pas krizës së borxhit sovran një dekadë më parë. Në atë kohë këto rregulla u vlerësuan për shkak të kostos së ulët dhe bazës konkuruese, por njëkohësisht u kritikuan për gërryerjen e të drejtave të punëtorëve dhe nxitjen e shumë të rinjve spanjollë që të zgjidhnin emigrimin.

Shkalla e papunësisë tek të rinjtë e cila arriti në më shumë se 55% në vitet pas krizës financiare ra në 31% në tremujorin e tretë kundrejt një norme të përgjithshme papunësie prej 12.6%. Të dhënat janë konfirmuar nga zyra kombëtare e statistikave.

Papunësia e të rinjve mbetet një problem kronik në vendet e Europës Jugore. Një në katër të rinj ishte i papunë në Itali gjatë verës, sipas të dhënave të Eurostat. Nga ana tjetër Greqia, shkalla e papunësisë për të rinjtë e të cilës është e ngjahsme me atë të Spanjës, dëshiron ta ulë atë në 18% deri në vitin 2030. Për këtë arsye vendi po prezanton subvencione për kostot e pensioneve dhe fondeve shëndetësore për të ulur kostot e punës, si dhe programe speciale trajnimi.

Në një kohë që normat e papunësisë tek të rinjtë u përmirësuan në Spanjë si rrjedhojë e rimëkëmbjes ekonomike pas krizës financiare, në verën e vitit 2021 shtatë nga cdo 10 të rinj kishin një kontratë pune të përkohshme. Kjo normë u ul me 13 pikë përqindjeje në tremujorin e tretë të 2022 pas rregulloreve të reja të punës, duke e vendosur Spanjën në një situatë pak më mirë në këtë drejtim, në krahasim me ekonomitë më të pasura si Holanda apo Italia.

Reforma e punës, e negociuar me punëdhënësit dhe sindikatat dhe e prezantuar në mars, shfuqizoi shumicën e vendeve të punës të përkohshme në një përpjekje për të siguruar stabilitetin e vendeve të punës dhe për të ulur shkallën e papunësisë. Më parë, punëdhënësit përdornin kontratat e përkohshme si një rrjetë sigurie në kohë krize.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.