Miliona duhanpirës drejt tregut të paligjshëm – Franca mbetet tregu më i madh në Europë për konsumin e cigareve të falsifikuara
Philip Morris International i ka kërkuar ligjvënësve europianë që të marrin në konsideratë miliona duhanpirësit e rritur të cilët i drejtohen tregut të paligjshëm në vend që të kalojnë tek alternativat teknologjike pa djegie. Studimi i KPMG, rrjeti global i firmave profesionale që ofrojnë shërbime auditimi, taksash dhe këshillimi, mbi konsumin e cigareve të paligjshme i kryer në vitin 2021, i komisionuar nga Philip Morris International, tregon se konsumi i cigareve të falsifikuara është rritur me 3.9% – thënë ndryshe 1.3 miliard cigare më shumë – vitin e kaluar, duke arritur në 35.5 miliard cigare të falsifikuara të konsumuara në shtetet anëtare të Bashkimit Europian.
Sipas raportit rritja e konsumit të cigareve të falsifikuara në Bashkimin Europian është shkaktuar dhe si pasojë e rritjes me 33% të konsumit të cigareve të falsifikuara në Francë, që vitin e kaluar ka arritur në 8 miliard cigare. Franca mbetet tregu më i madh në Europë për konsumin e cigareve të falsifikuara, me një total prej 15.1 miliard cigaresh të falsifikuara të konsumuara në vitin 2021, të barabartë me 29% të konsumit total të cigareve në vend; dhe që përfaqëson një rritje domethënëse në krahasim me 13% në vitin 2017.
Sipas ekspertëve është shqetësuese që në vendet me një nivel të lartë taksash për sa i përket prodhimit të duhanit si Franca, rezultati është rritja e konsumit të produkteve të falsifikuara dhe pakësimi i duhanpirësve të rritur të cigareve tradicionale.
Vendet e BE-së që kanë ndërmarrë politika të diferencuara për alternativat ndaj cigareve tradicionale po marrin rezultate inkurajuese, duke favorizuar rënien e vazhdueshme të numrit të atyre që konsumojnë cigare tradicionale me djegie dhe në të njëjtën kohë duke tkurrur tregun e paligjshëm.
Raporti vjetor i KPMG fokusohet në konsumin dhe flukset e cigareve të paligjshme në 30 vende europiane – 27 vende anëtare të BE-së, si dhe në Mbretërinë e Bashkuar, Norvegji dhe Zvicër – dhe tregon se nëse këto cigare do të bliheshin në mënyrë të ligjshme, qeveritë e ‘BE do të kishin mbledhur 10.4 miliardë euro më shumë taksa.
Raporti tregon gjithashtu se rreth gjysma – 16 nga 27 – e Shteteve Anëtare shënojnë një rënie ose qëndrueshmëri në konsumin e cigareve të paligjshme në vitin 2021.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.