Monitorimi i planeve të eficiencës së energjisë – Mungon sistemi zyrtar për të dhënat energjetike, hapet tenderi për ngritjen e databazës

Në Shqipëri mungon sistemi zyrtar i grumbullimit dhe përpunimit të të dhënave energjetike e në veçanti ai për të dhënat e konsumit të energjisë. Shqetësimi ngrihet nga Agjencia për Eficiencën e Energjisë, që shton se si rrjedhojë, hasen vështirësi të dukshme në hartimin dhe monitorimin e të gjitha planeve të eficiencës së energjisë dhe burimeve të rinovueshme.

Po ashtu, sipas Agjencisë kjo vështirësi haset edhe në drejtim të strategjive dhe planeve kombëtare si dhe për monitorimin e targeteve të klimës për reduktimin e emetimeve të dioksidit të karbonit, bazuar në kërkesat e BE-së dhe Marrëveshjes së Klimës, të nëshkruar në Paris.

Nisur nga kjo situatë, AEE ka hapur një tender me vlerë 31.7 mln lekë, që ka si objektiv kryesor ngritjen e bazës së të dhënave për statistika dhe bilance, në sektorin e konsumit rezidencial, shërbime, transport, industri dhe bujqësi në përputhje me standardet e EUROSTAT-it.

Në dokumentet e tenderit, Agjencia specifikon se deri tani parashikime dhe bilancet energjetike janë përgatitur duke përdorur qasjen/metodën ‘nga lart-poshtë’ meqë është e pamundur që të dhënat e nevojshme të grumbullohen në përputhje me qasjen/metodën ‘poshtë-lart’, kombinuar kjo me metodën e përmendur më herët.

“Realizimi i këtij projekti do të vendosë bazat e krijimit të një sistemi funksional për dizajnimin dhe mirëmbajtjen e sistemit të bilancit dhe statistikave në nivel kombëtar në Shqipëri.

Kjo do të mundësojë përgatitjen e bilancit energjetik plotësisht sipas standarteve të Eurostatit, parashikimeve të nevojave për energji dhe bilanceve bashkiake të energjisë jo vetëm plotësisht në përputhje me normat e EUROSTAT-it, por edhe të tilla, që ato t’i shërbejnë edhe planifikimit të zhvillimit të energjisë dhe klimës në nivel kombëtar dhe bashkiak”, – thuhet ndër të tjera në dokument.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.