Moody’s rrit perspektivën e borxhit të Italisë në të qëndrueshme në nxitje për qeverinë e Meloni!

Moody’s e la vlerësimin e borxhit sovran të Italisë në Baa3, një shkallë mbi junk, por e përmirësoi perspektivën në të qëndrueshme nga negative, në një nxitje të papritur për qeverinë e kryeministres Giorgia Meloni.

Shumica e analistëve kishin pritur që agjencia të linte të pandryshuar vlerësimin dhe perspektivën e Italisë.

Moody’s e kishte vendosur ekonominë e tretë më të madhe të eurozonës në një perspektivë negative në gusht të vitit të kaluar pas një kolapsi të qeverisë dhe në mes të një krize energjitike.

“Vendimi për të ndryshuar perspektivën në të qëndrueshme nga negative reflekton një stabilizim të perspektivave për fuqinë ekonomike të vendit, shëndetin e sektorit të tij bankar dhe dinamikën e borxhit të qeverisë,” tha Moody’s.

Moody’s ishte agjencia e katërt që shqyrtoi Italinë në muajin e fundit. S&P Global, DBRS dhe Fitch kanë lënë të pandryshuara vlerësimet dhe perspektivat e tyre. Ministri i Ekonomisë Giancarlo Giorgetti e përshëndeti njoftimin.

“Është një konfirmim që pavarësisht shumë vështirësive ne po punojmë mirë për të ardhmen e Italisë”, tha ai në një deklaratë.

“Pra, në dritën e gjykimit të shprehur nga Moody’s dhe agjencitë e tjera të vlerësimit, ne shpresojmë që politikat e kujdesshme, të përgjegjshme dhe serioze buxhetore të qeverisë…do të konfirmohen nga parlamenti,” shtoi ai.

Buxheti i qeverisë për vitin 2024 po kalon aktualisht në parlamentin italian. Ekonomia italiane ngeci në stanjacion në tremujorin e tretë krahasuar me tre muajt e mëparshëm, treguan të dhënat paraprake muajin e kaluar, pas tkurrjes me 0.4% midis prillit dhe qershorit. Analistët parashikojnë se aktiviteti do të mbetet i dobët në tremujorët e ardhshëm.

Komisioni Europian parashikoi të mërkurën se borxhi i Italisë, proporcionalisht i dyti më i madhi në eurozonë, do të rritet pak nga 140% e parashikuar e prodhimit kombëtar këtë vit në 141% në 2025.

Hendeku midis yield-eve të obligacioneve 10-vjeçare italiane dhe ekuivalentit të tyre gjerman është dukshëm më i madh se diferenca e çdo vendi tjetër të eurozonës kundrejt Gjermanisë. Megjithatë, ai është ngushtuar në nën 1.75 pikë përqindjeje (175 pikë bazë) nga një kulm i fundit prej 209 pikë bazë më 9 tetor.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.