Mungesa globale e orizit – Niveli më i lartë i regjistruar në 20 vitet e fundit

Nga Kina në Shtetet e Bashkuara të Amerikës si dhe në Bashkimin Europian, prodhimi i orizit po shënon rënie, duke shkaktuar një rritje të çmimit për më shumë se 3.5 miliardë njerëz në të gjithë globin, veçanërisht në Azi-Paqësor ku konsumohet 90% e orizit në botë.

Tregu global i orizit aktuakisht regjistron mungesën e tij më të madhe në dy dekada në vitin 2023, sipas Fitch Solutions. Sipas analistëve të sektorit, një deficit i këtyre përmasave për një nga drithërat më të kultivuara në botë do të dëmtojë importuesit e mëdhenj. Ata theksuan se në nivel global, ndikimi më i dukshëm i deficitit global të orizit ka qenë dhe mbetet çmimi i lartë gjatë dekadës.

Çmimet e orizit pritet të mbeten në nivele të larta deri në vitin 2024, thuhet në një raport. Çmimi i orizit ishte mesatarisht 17.30 dollarë për çdo 45.3 kilogramë deri në vitin 2023 dhe do të ulet vetëm në 14.50 dollarë, sipas raportit. Duke pasur parasysh se orizi është malli kryesor ushqimor në tregje të shumta në Azi, çmimet janë një përcaktues kryesor i inflacionit të çmimeve të ushqimit dhe sigurisë ushqimore, veçanërisht për familjet më të varfra.

Sipas parashikimeve të raportit mungesa globale për 2022/2023 do të arrijë në 8.7 milion ton. Kjo do të shënonte deficitin më të madh global të orizit që nga viti 2003/2004, kur tregjet globale të orizit gjeneruan një deficit prej 18.6 milionë tonësh. Aktualisht ka një furnizim të reduktuar me oriz si rezultat i luftës së vazhdueshme në Ukrainë, si dhe motit të keq në ekonomitë prodhuese të orizit si Kina dhe Pakistani. Në gjysmën e dytë të vitit të kaluar, një pjesë e tokës bujqësore në prodhuesin më të madh të orizit në botë, Kinë, u rrënuan nga reshjet e dendura të verës dhe përmbytjet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.