Mungojnë produktet ushqimore në Britani – Vendi po shkon drejt një dimri të zymtë, pasi çmimet vijojnë të rriten
Përtej mungesës së disa produkteve, inflacioni i ushqimeve ka shënuar një rekord në Britaninë e Madhe gjatë muajit nëntor. Vendi po shkon drejt një dimri të zymtë, pasi çmimet vijojnë të rriten sipas Konsorciumit Britanik të Shitjeve me Pakicë – BCR – veçanërisht për mishin, vezët dhe qumështin. Rritja e çmimeve mund të fillojë të lehtësohet në vitin 2023.
Përveç inflacionit, mungesat dhe zinxhirët e zgjatur të furnizimit po lënë bosh raftet e supermarketeve duke privuar konsumatorët nga produktet kryesore.
Disa supermarkete në Mbretërinë e Bashkuar kanë raportuar mungesa në furnizimin me vezë gjatë muajit të fundit. Mungesa ka çuar në kufizimin e numrit të kutive që klientët mund të blejnë në zinxhirët kryesorë. Sipas Departamentit të Mjedisit, Ushqimit dhe Çështjeve Rurale, tregu i vezëve është ndikuar nga rritja e kostos së energjisë dhe ushqimit të kafshëve – pjesërisht e shkaktuar nga pushtimi rus i Ukrainës – si dhe nga një shpërthim i gripit të shpendëve. Kombinimi i ndërlikuar i faktorëve që kontribuojnë në presionin në tregun e vezëve do të thotë se nuk është e qartë se kur ka të ngjarë të përfundojë mungesa.
Konsumatorët duhet të presin mungesë të gjelave të detit këtë vit. 1 milion nga 8.5-9 milion gjelat e zakonshëm të prodhuar në Mbretërinë e Bashkuar kanë ngordhur nga gripi i shpendëve.Rritja e çmimeve të energjisë – e kombinuar me mungesën e njerëzve për të grumbulluar të mbjellat – po prek gjithashtu kultivuesit e frutave dhe perimeve.
Kostoja e prodhimit për fermerët është rritur me 27% në 12 muajt e fundit. Më shumë janë prekur ushqimet si domatet, brokoli, mollët dhe perimet me rrënjë. Në korrik, prodhuesi më i madh i qumështit dhe gjalpit në Mbretërinë e Bashkuar, Arla Foods, paralajmëroi se vendi ishte në prag të mungesës. Një mungesë masive e punëtorëve nënkuptonte se fermerët duhej të reduktonin prodhimin. Edhe pse kjo mungesë nuk është materializuar ende në raftet e supermarketeve, çmimet e qumështit dhe gjalpit janë rritur ndjeshëm.
Flitet edhe për një “krizë të patates” pasi kjo kulturë vuan nga ndikimi i ndryshimeve klimatike. Çmimet e patates tashmë janë rritur me pothuajse 20 për qind dhe mund të dyfishohen këtë dimër.
Në përgjithësi, ndryshimet klimatike dhe çmimet e karburanteve fosile mund të bëjnë që inflacioni i ushqimeve të jetë rreth 11% në vitin 2022, sipas një raporti nga Njësia e Inteligjencës për Energjinë dhe Klimën.
Kjo do të thotë se faturat mesatare mujore të blerjeve shtëpiake do të rriten me 33.9 paund – rreth 400 paund në vit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.