Na duhet në të vërtetë euro digjitale?! – Drejtuesit e bankave, të shqetësuar nga kostot

Njoftimi i Bankës Qendrore Europiane se do të prezantojë euron digjitale pas disa vitesh do të thotë se është koha për të parë qartë vlerën e kësaj forme të re parash. Lëvizja e BQE-së për të prezantuar një monedhë digjitale pilot për 20 vendet e Eurozonës mund të jetë një hap i madh, pasi është banka e parë qendrore e madhe që e bën këtë. Mbështetësit e saj argumentojnë se do të modernizojë pagesat dhe do të ofrojë një alternativë ndaj parave të gatshme.

Por mbeten pyetje se në çfarë kuptimi monedhat digjitale të bankës qendrore janë progres, duke pasur parasysh se ato përdoren pak në vendet që i kanë adoptuar ato, ndërkohë që shkaktuan protesta kundër planeve të BQE-së, me njerëzit që kanë frikë se lëvizjet e tyre do të spiunohen. Drejtuesit e bankave i tremben kostos, por edhe mundësisë së hemorragjisë së depozitave që mund të transferohen në llogaritë e bankës qendrore.

Firmat që gjurmojnë monedhat digjitale të bankës qendrore, theksojnë se BQE është një nga bankat qendrore më të mëdha dhe do të jetë shumë me ndikim nëse ka përgjigje për çështjet e privatësisë, sigurisë kibernetike dhe përdorshmërisë në botën reale.

Bankat qendrore u alarmuan seriozisht pesë vjet më parë kur Facebook zbuloi planet e tij për një monedhë digjitale. Sot, megjithatë, vendimmarrësit duhet të jenë bindës në atë që konsiderojnë si nevojë për monedhat digjitale të bankës qendrore. Fabio Panetta, zyrtari i BQE-së që mbikqyr punën për euron digjitale, tha se ato do të reduktonin varësinë e tepërt në sistemet e pagesave të bazuara në kartat e kreditit në SHBA.

Analistët shprehen se ende nuk është e qartë se çfarë saktësisht do të mund të bëhet me monedhat digjitale që nuk mund të bëhen me para të zakonshme. E panjohura është nëse Rezerva Federale, ose Banka e Japonisë do të prezantojnë monedhat e tyre digjitale. Megjithatë, vlen të përmendet se në të gjitha vendet ku janë hedhur në treg monedhat digjitale, vëllimi i transaksioneve mbetet zhgënjyes.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.