Borxhi publik kalon pragun 13 miliardë euro – Nga viti 2020, deri në shtator 2023 huaja qeveritare u rrit me 3 miliardë euro

Pas një rënie të lehtë në vitin 2022, borxhi publik i Shqipërisë ka shënuar rritje drastike gjatë nëntëmujorit të këtij viti në vlerën 1.39 trilionë lekë, ose më shumë se 13 miliardë euro. Për herë të parë borxhi publik në 2023 ka kaluar nivelin e 13 miliardë eurove, duke u shtuar me plot 1 miliardë euro në harkun kohor të nëntë muajve.

Krahasuar me vitin 2020, kur totali i huasë qeveritare ishte dicka më pak se 9.9 miliardë euro, borxhi publik është shtuar me plotë 3 miliardë euro. Rritja drastike vjen pavarësisht se Qeveria ka pasur një situatë shumë favorizuese sa i përket shërbimit të borxhit, për shkak të mbiccmimit të fortë të lekut në raport me euron.

Por pavarësisht kësaj, i matur në raport me produktin e brendshëm borxhi publik rezulton në rënie, për shkak të rritjes së të të ardhurave të Qeverisë. Borxhi publik në këtë nëntëmujor është sa 64.01% e Produktit bruto, duke shënuar kësa here një rekord në rënie. Kujtojmë se mazhoranca socialiste nisi Qeverisjen në vitin 2013 me një nivel borxhi prej 65.5%.

Sa i përket strukturës së tij, bie në sy se pjesa më e madhe e borxhit të ri është marrë në tregun e brendshëm. Nga 5.2 miliardë euro në vitin 2020, borxhi i brendshëm rezulton në mbi 7 miliardë për nëntëmujorin e vitit 2023.

Rritje më graduale ka shënuar borxhi i jashtëm, i cili ka mbetur në nivelin 5.6 miliardë euro në vitet 2021-2022 për të kërcyer në vitin 2023 në mbi 6 miliardë euro për nëntëmujorin e këtij viti. Një pjesë e mirë e kësaj rritjeje i detyrohet eurobondit të emetuar në qershor të këtij viti në vlerën e 600 milionë eurove.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.