Semafori me 16 ekrane në Barcelonë – Tërbohen drejtuesit e mjeteve, kaos në trafik

Në qytetin më të madh të Katalonjës, semaforët për çiklistët shkaktojnë probleme serioze në trafik, gjë që nuk është për t’u habitur kur shihet se si duket njëri prej tyre. I ashtuquajturi ‘semafori tetrix’ në Barcelonë ka deri në 16 ekrane dhe fillimisht është krijuar për të lehtësuar lëvizjen për numrin në rritje të njerëzve që zgjedhin të shkojnë me biçikletë në punë, shkollë ose dyqan. Sidoqoftë, në vend të efikasitetit të përmirësuar të trafikut, dizajni çoi në rezultate krejtësisht të kundërta.

Ekrane të shumta tregojnë se kur çiklistët mund të kthehen majtas, drejt ose djathtas. Në teori funksionon shkëlqyeshëm, por në praktikë shumë drita dhe shigjeta të ndryshme ngatërrojnë plotësisht çiklistët, si dhe të gjithë përdoruesit e tjerë të rrugës. Pavarësisht ankesave të shumta, autoritetet e qytetit nuk shohin problem në semaforët e rinj dhe u thonë çiklistëve që të mësohen me rregullat e reja të qarkullimit.

Menjëherë pas vendosjes së tij, tabela shkaktoi reagime të mëdha në rrjetet sociale, ku përdoruesit e krahasuan me “një lojë shahu” dhe “Tetris”. Shumë bënë shaka për kompleksitetin e tij, por ankesat e vërteta filluan të shfaqen shpejt. Çiklistët ndiheshin të humbur përpara këtij labirinti dritash dhe tabelash, dhe drejtuesit e mjeteve të tjera shpesh ishin të hutuar se si të interpretonin semaforët. Situata po bëhej gjithnjë e më problematike, kritikat vetëm po grumbulloheshin dhe autoritetet e qytetit nuk treguan vullnet për ndryshim.

Barcelona ka një rrjet të madh të shtigjeve për biçikleta që shtrihen për gati 250 kilometra. Qyteti ka një gamë të gjerë shtigjesh, duke përfshirë shtigje të shënuara mirë përgjatë bulevardit, shtigje të përshtatura për çiklizëm malor dhe lidhje të shkëlqyera me zonat përreth. Prandaj, nuk është për t’u habitur që “bicikleta” po afirmohet gjithnjë e më shumë si një mjet i preferuar transporti midis banorëve të kryeqytetit të Katalonjës. Pandemia e Covid-19 e ka nxitur edhe më tej këtë trend, duke inkurajuar popullsinë vendase të hipë në dy rrota.

Mund të mos jetë ende në të njëjtin nivel me Holandën apo Danimarkën, ku çiklistët duket se kanë përparësi mbi të gjithë të tjerët, por krahasuar me qytetet e tjera të Europës Jugore, Barcelona padyshim kryeson rrugën si një parajsë çiklizmi!

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.