Nafta, e qëndrueshme pranë 78 USD – Në fokus, bisedimet për borxhin në SHBA dhe takimi i OPEC+

Nafta po qëndron në rënie në sesionin e sotëm, për shkak të paqartësive në lidhje me rritjen e tavanit të borxhit në SHBA. Edhe forcimi i dollarit amerikan ka ndikuar në rënien e çmimeve. Megjithatë, humbjet janë kufizuar nga parashikimet se OPEC+ mund të vendosë të reduktojë sërish kuotat e prodhimit në takimin e 4 qershorit.

Nafta Brent e Londrës po tregtohet në rreth 78 dollarë për fuçi, ndërsa nafta Bruto amerikane po tregtohet në rreth 74 dollarë për fuçi. Megjithatë, Spikeri i Dhomës së Përfaqësuesve, Kevin McCarthy, deklaroi se është bërë progres por ka ende disa çështje për tu zgjidhur, në mënyrë që të rritet tavani i borxhit prej 31.4 trilionë dollarë. Në sesionin e kaluar, çmimet u mbështetën nga paralajmërimet e ministrit saudit të energjisë, i cili tha se investitorët që vendosin baste afatshkurtra për rënien e çmimeve, duhet të mendohen mirë për humbjet e tyre.

Vendimtar në politikat e Organizatës së Vendeve Eksportuese të Naftës dhe aleatëve të tjerë, do të jetë takimi i 4 qershorit, ku do të përcaktohen politikat e prodhimit për të ardhmen. Çmimet po gjejnë një mbështetje edhe nga rënia e konsiderueshme e rezervave të naftës në SHBA, gjatë javës që u mbyll më 19 maj.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.