Dollari, në nivelin më të lartë në 2 muaj – Mbështetet nga të dhënat pozitive mbi ekonominë amerikane
Dollari ka vijuar tendencën në rritje edhe në sesionin e sotëm dhe ka prekur nivelin më të lartë në 2 muajt e fundit përballë euros. Monedha e gjelbër është mbështetur nga të dhënat pozitive mbi ekonominë amerikane dhe nga kërkesa e investitorëve për asete të sigurta. Në fokus të tregjeve janë bisedimet për rritjen e tavanit të borxhit në SHBA dhe raundi tjetër do të zhvillohet ditën e sotme. Sekretarja e Thesarit, Janet Yellen ripërsëriti se nëse nuk do të ketë një marrëveshje deri në 1 qershor, atëherë ekonomia më e madhe në botë do të shkojë drejt recesionit.
Edhe agjencia e vlerësimit të kreditit, Fitch, e vendosi ekonominë amerikane në këndvështrim negativ, sepse përballet me një krizë të menjëhershme nëse nuk do të ketë një marrëveshje për tavanin e borxhit. Euro ka zbritur deri në 1.0730 dollarë, niveli më i ulët që nga 24 marsi.
Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104, niveli më i lartë në 2 muajt e fundit. Ndërkohë, në tregun e kriptomonedhave, bitcoin po tregtohet në rreth 26,200 dollarë, ndërsa ethreum po tregtohet në rreth 1780 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.