Bursat europiane zgjerojnë humbjet – Ekonomia gjermane kontraktohet me 0.3% në tremujorin e parë
Bursat europiane po qëndrojnë në rënie edhe në sesionin e sotëm, sepse ende nuk ka shenja reale për një marrëveshje për të rritur tavanin e borxhit në SHBA. Indeksi pan-Europian Stoxx 600 e ka nisur ditën në rënie me 0.2%, ndërsa sektori i teknologjisë kryeson fitimet, në rritje me 1.7%.
Ndërkohë, edhe indekset kryesore në Wall Street u mbyllën në rënie në sesionin e kaluar, pasi agjencia e vlerësimit të kreditit, Fitch, e mbajti të pandryshuar nivelin 3A për ekonominë amerikane, por paralajmëroi se e ka vendosur në këndvështrim negativ, për shkak se negociatat për tavanin e borxhit nuk po japin ende rezultate. Sipas Fitch, ekonomia më e madhe në botë përballet me një krizë të menjëhershme, nëse nuk do të ketë një marrëveshje deri në 1 qershor.
Ndërkohë, të dhënat e rishikuara nga Zyra e Statistikave në Gjermani treguan se ekonomia më e madhe në Europë ra me 0.3% në tremujorin e parë të këtij viti, duke e futur ekonominë në një recesion teknik.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.