Nafta, e qëndrueshme pranë 88 USD – Tkurret furnizimi i tregut në SHBA, frikë për recesion në Eurozonë

Çmimet e naftës po tregtohet të qëndrueshëm në sesionin e sotëm pasi shenjat për shtrëngimin e furnizimit të tregut në SHBA kanë eklipsuar të dhënat ekonomike që sugjerojnë një ngadalësim të kërkesës.

Nafta Brent e Londrës po tregtohet në rreth 88 dollarë për fuçi, ndërsa nafta Bruto amerikane po tregtohet në rreth 84 dollarë për fuçi. Edhe diferenca mes dy kontratave është zgjeruar në rreth 4 dollarë, dnë favor të naftës Brent. Në tre sesionet e fundit, të dy bençmarkët kanë publikuar humbje, për shkak se janë larguar shqetësimet për një përhapje të konfliktit mes Izraelit dhe Hamasit edhe në vendet e tjera të Lindjes së Mesme.

Të dhënat e inudstrisë në SHBA treguan se furnizimi i tregut u tkurr me rreth 2.7 milionë fuçi naftë, gjatë javës që u mbyll më 20 tetor, referuar shifrave të Institutit Amerikan të Naftës. Analistët e anketuar nga Reuters parashikonin një rritje të rezervave me rreth 200 mijë fuçi.

Megjithatë, tregjet po presin të dhënat zyrtare që publikohen më vonë gjatë ditës së sotme nga Administrata për Informimin mbi Energjinë. Ndërkohë, aktiviteti i biznesit në Eurozonë mori një kthesë surprizë këtë javë, duke sugjeruar se blloku mund të bjerë në recesion, që për rrjedhojë do të dëmtojë edhe kërkesën për naftë. Edhe të dhënat në Gjermani sugjerojnë se ekonomia më e madhe e Europës është drejt tkurrjes, ndërsa edhe bizneset në Britani raportuan një rënie të aktivitetit.

Investitorët janë të fokusuar edhe te zhvillimet në Lindjen e Mesme, pasi i frikësohen një përhapje të mundshme të konfliktit edhe në vendet e tjera të rajonit të pasur me naftë. Vende si Shtetet e Bashkuara, Kanadaja, Rusia dhe shtetet arabe kërkuan një armëpushim në luftimet midis Izraelit dhe Hamasit në Rripin e Gazës, në mënyrë që ndihmat humanitare të mund t’u dërgohen civilëve palestinezë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.