Nafta ngjitet në mbi 77 USD për fuçi – Mbështetet nga rritja e kërkesës në SHBA. Në fokus takimi i OPEC+

Nafta po qëndron në rritje edhe në sesionin e sotëm, për shkak të pritshmërive për rritjen e kërkesës dhe spekulimeve se OPEC+ mund të ulë sërish kuotat e prodhimit në takimin e qershorit. Nafta Brent e Londrës po tregtohet në rreth 77.5 dollarë për fuçi, ndërsa nafta Bruto amerikane po tregtohet në rreth 74 dollarë për fuçi.

Të dhënat jo zyrtare të publikuara në SHBA treguan se rezervat e naftës ranë ndjeshëm, me rreth 6.8 milionë fuçi, gjatë javës që u mbyll më 19 maj. Edhe rezervat e benzinës ranë me 6.4 milionë fuçi. Megjithatë, investitorët po presin të dhënat zyrtare që publikohen nga Administrata për Informimin mbi Energjinë.

Analistët parashikojnë se kërkesa në SHBA do të rritet edhe më tej, sepse në 29 maj fillon zyrtarisht edhe sezoni i pushimeve verore. Në fokus të tregjeve është takimi i OPEC+ në fillimi të qershorit dhe analistët parashikojnë se vendet prodhuese mund të vendosin një tjetër reduktim të kuotave të prodhimit. Gjithashtu, investitorët po presin edhe bisedimet për rritjen e tavanit të borxhit në SHBA dhe raundi i radhës do të mbahet të enjten.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.